Paleścinskaja hrupoŭka CHAMAS paviedamiła pra rospusk struktury, jakaja kiravała siektaram Haza amal dva dziesiacihodździ. Kiraŭnik tak zvanaha Kamiteta nadzvyčajnaha kiravańnia Machamied al-Fara padaŭ u adstaŭku, a sam orhan spyniŭ dziejnaść, piša Euronews.
U CHAMAS zajavili, što heta rašeńnie pavinna palehčyć pieradaču cyvilnaha kiravańnia Nacyjanalnamu kamitetu kiravańnia Hazaj (NCAG), jaki ŭznačalvaje paleścinski technakrat Ali Šaat.
Pavodle zajavy pradstaŭnikoŭ ruchu, rospusk urada źjaŭlajecca «žestam dobraj voli» i śviedčyć pra hatoŭnaść admovicca ad niepasrednaha kiravańnia siektaram Haza dziela prasoŭvańnia palityčnaha ŭrehulavańnia.
CHAMAS kantralavaŭ siektar Haza z 2007 hoda paśla ŭzbrojenaha supraćstajańnia z rucham «Fatch». Paśla ŭstupleńnia ŭ siłu režymu spynieńnia ahniu pamiž CHAMAS i Izrailem u kastryčniku 2025 hoda hrupoŭka nieadnarazova zajaŭlała pra hatoŭnaść pieradać cyvilnyja paŭnamoctvy, adnak pytańnie jaje razzbrajeńnia zastajecca niavyrašanym.
Nacyjanalny kamitet kiravańnia Hazaj niekalki miesiacaŭ nie moh pačać pracu ŭ ankłavie, pakolki jaho ŭjezd tudy, jak paviedamlajecca, błakavaŭ Izrail.
Pradstaŭniki CHAMAS taksama zajavili, što prainfarmavali inšyja paleścinskija palityčnyja siły pra svajo rašeńnie padčas sustrečy ŭ Kairy. Pavodle ich słoŭ, udzielniki pieramoŭ vitali hety krok jak mahčymaść paskoryć pierachod da novaj sistemy cyvilnaha kiravańnia.
Niahledziačy na heta, klučavyja pytańni druhoha etapu paślavajennaha ŭrehulavańnia — razzbrajeńnie CHAMAS, vyvad izrailskich vojskaŭ i budučaja sistema kiravańnia siektaram Haza — pa-raniejšamu zastajucca pradmietam supiarečnaściaŭ.
Ciapier čytajuć
Pačobut parazvažaŭ, ad čaho zaležyć budučynia Biełarusi8
Kamientary