Zvolnili hałoŭnaha śledčaha Minskaj vobłaści. U 2020 hodzie jon mocna zaśviaciŭsia
Alaksandr Łukašenka padpisaŭ ukaz ab vyzvaleńni Siarhieja Udovikava z pasady načalnika ŭpraŭleńnia Śledčaha kamiteta Minskaj vobłaści.
Siarhieja Udovikava zvolnili sa słužby ŭ Śledčym kamitecie z pravam našeńnia ŭstanoŭlenaj formy adzieńnia i znakaŭ adroźnieńnia. Zrabili heta «ŭ suviazi z pahadnieńniem bakoŭ» — davoli niezvyčajnaja farmuloŭka, kali idzie havorka pra adstaŭki vysokapastaŭlenych siłavikoŭ.
Pierad tym, jak u krasaviku 2024 hoda stać kiraŭnikom upraŭleńnia Śledčaha kamiteta Minskaj vobłaści, Siarhiej Udovikaŭ kiravaŭ anałahičnym upraŭleńniem u Homielskaj vobłaści.
Mienavita padčas jahonaha kiravańnia strukturaj prachodziła pravierka pavodle fakta śmierci 11 žniŭnia 2020 hoda, padčas paślavybarčych pratestaŭ žychara Homiela Alaksandra Vichora.
U zaviadzieńni kryminalnaj spravy pa fakcie śmierci Vichora tady było admoŭlena. Siarhiej Udovikaŭ tady zajaviŭ, što śmierć pratestoŭca nibyta nie mieła kryminalnaha charaktaru. Pavodle jaho słoŭ, siłaviki prymianili fizičnuju siłu «abhruntavana», a pryčynaj śmierci stała raptoŭnaje abvastreńnie zachvorvańnia sardečna-sasudzistaj sistemy. Pierałomy rebraŭ i hrudziny, jak śćviardžaŭ Udovikaŭ, uźnikli nibyta ŭ vyniku praviadzieńnia reanimacyjnych mierapryjemstvaŭ.
Nahadajem, 25‑hadovaha Alaksandra Vichora zatrymali ŭviečary 9 žniŭnia na vulicy Savieckaj u Homieli, pa słovach rodnych, jon jechaŭ da svajoj dziaŭčyny. Siamja šukała syna try dni: telefanavali i chadzili ŭ RAUS, dziažuryli da nočy la SIZA i IČU. I tolki kali 12 žniŭnia rodnyja pryjechali ŭ milicyju pisać zajavu ab źniknieńni čałavieka, stała viadoma: Sašy niama ŭ žyvych jašče z 11‑ha žniŭnia.
«Admovili ŭ zaviadzieńni spravy pa śmierci Sašy». Zavieršana pravierka pa spravie Alaksandra Vichora z Homiela, jaki pamior padčas pratestaŭ
Na mahile pamierłaha paśla razhonu pratestaŭ u Homieli Alaksandra Vichora pastavili pomnik FOTA
Što pakazała ekśpiertyza pa Alaksandru Vichoru, jaki zahinuŭ u Homieli ŭ pieršyja dni pratestaŭ
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary