«Imhła» i «Beavulf»
Sacyjalny šok i aholenaja Andželina Džoli.
IMHŁA (Mist)
ZŠA, 2007, kalarovy, 127 chv.
Režyser: Frenk Darabont
Roli vykonvajuć: Tomas Džejn, Marsia Hej Harden, Natan Hembł, Aleksa Davałas, Ŭiljam Sedler, Krys Oŭen, Łory Hołden, Tobi Džonz
Žanr: Dramatyčnaja žudasnaja fantastyka pavodle apaviadańnia Styvena Kinha i scenaru Frenka Darabonta
Mastactva / Strach: 7,5 / 7
Paśla bury na miastečka spuskajecca tuman. A razam z tumanam u horad prychodziać žudasnyja istoty. Nievialičkaja hrupa ludziej barykadujecca ŭ supermarkiecie…
Karcinaŭ pra našeście hadaŭ na maleńkija amerykanskija haradki isnuje nieźličonaja kolkaść, dyj Styvenu Kinhu redka šancavała na dobryja ekranizacyi. Ale režyser Frenk Darabont, tvorca “Zialonaj mili” i "Uciokaŭ za Šaŭšenku", pieraŭtvaraje zvykły siužet u zamaskavanaje sacyjalnaje pasłańnie.
Izalavanaja hrupa – madel hramadztva, a vuściš vyśviečvaje čałaviečuju naturu. Zaciatyja bojki za aŭtarytet, relihijny fanatyzm (rej viadzie kalarytnaja Marsija Hej Hardzin). Niebiaśpieka chavajecca nia stolki ŭ tumanie, kolki ŭ pozirkach suajčyńnikaŭ, hatovych prynieści ŭ achviaru bližniaha. A niestandartny finał stužki – padkop pad “suciašalnicki” žanr kašmaraŭ (što nie ŭsim hledačam daspadoby) i padryŭ amerykanskaje mary. Hałoŭnaja imhła – u sercy.
BEAVULF (Beowulf)
ZŠA, 2007, kalarovy, 115 chv.
Režyser: Robert Zemekis
Roli vykonvajuć: Rej Ŭinstan, Entani Hopkinz, Džon Małkavič, Kryśpin Hłover, Andželina Džoli
Žanr: Kamputarna-ihravy mit pavodle adnajmiennaj lehiendy
Adznaka: za kinatvor 3, za reklamu kamputarnaj hulni 10
Ziemli karala Chrodhara (Entani Hopkinz) spustašajucca trolem Hrendelem (Kryśpin Hłover). Hieroj Beavulf (Rej Ŭinstan) prychodzić na dapamohu karalu, ale ŭ pačvary jość jašče maci (Andželina Džoli)…
Robert Zemekis pieraŭtvaraje aktoraŭ u kamputarnyja lalki. Na cieły aktoraŭ ustaloŭvalisia datčyki, ruchi ličbavalisia – adyli atrymalisia virtualnyja makiety Džoli, Hopkinza, Małkaviča. Padobnaja technika dazvoliła stvaryć całkam mitalahičny śviet z byccam by žyvymi aktorami.
Bojka aholenaha Beavułfa z pačvaraj atrymała by ŭ ihravym kino žorstkaje cenzurnaje abmiežavańnie, što adsiakło by metavuju aŭdytoryju padletkaŭ. Ale vyratoŭvajuć kamputarnyja technalohii. A hałoŭnaja prynada filmu – aholenaja Andželina Džoli ŭ roli spakuślivaj demanicy.
Ale havaryć pra aktorskaje majstertva – dyj, uvohule, pra kino nie vypadaje. Stužka Zemekisa – sama šykoŭny reklamny rolik budučaj kamputarnaj hulni, što raspracoŭnikami j nie chavajecca.
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary