Ukrainskaja raźviedka acaniła niebiaśpieku ad vučeńniaŭ «Zachad-2025»
Hałoŭnaje ŭpraŭleńnie raźviedki Ministerstva abarony Ukrainy paviedamiła telekanału «Biełsat», što vučeńni «Zachad-2025», jakija z 12 pa 16 vieraśnia projduć u Biełarusi, choć i ŭtrymlivajuć peŭnyja ryzyki, ale pa svajoj sutnaści nosiać pakazalny, demanstratyŭny charaktar.
Va ŭkrainskaj raźviedcy adznačajuć, što maštaby hetych manieŭraŭ značna skaracilisia ŭ paraŭnańni z papiarednimi vučeńniami «Zachad». Pryčynaj staŭ niedachop asabovaha składu i techniki ŭ Rasii, pakolki asnoŭnyja bajazdolnyja padraździaleńni ciapier zadziejničanyja ŭ vajnie suprać Ukrainy. Na miescach pastajannaj dysłakacyi zastajucca ŭ asnoŭnym vajskoŭcy terminovaj słužby, jakija zajmajucca achovaj harnizonaŭ.
Meta vučeńniaŭ — pravierka hatoŭnaści Maskoŭskaj i Leninhradskaj vajskovych akruhaŭ, stvoranych u vyniku rearhanizacyi, da vykanańnia zadač na zachodnim i paŭnočna-zachodnim stratehičnym kirunkach. Asabliva heta aktualna z ulikam taho, što ŭ 2023 hodzie avijacyjnyja i marskija siły byli vyviedzienyja ź ich składu i padparadkavanyja asobnym hałoŭnym kamandavańniam.
U HUR padkreślivajuć, što vučeńni buduć bolš praktykavańniem dla kamandavańnia, čym realnym pierakidańniem vojskaŭ i ich treniroŭkaj na palihonach.
Tym nie mienš, ukrainskaja raźviedka nie vyklučaje, što ŭ čas manieŭraŭ mohuć adpracoŭvacca elemienty infarmacyjna-psichałahičnych i hibrydnych dziejańniaŭ suprać susiednich krain. Heta moža ŭklučać arhanizacyju mihracyjnych kryzisaŭ, infarmacyjnyja kampanii pra jadziernuju zbroju, a taksama demanstracyju rakietnych kompleksaŭ «Arešnik». Choć u ŚMI i źjaŭlałasia infarmacyja pra padrychtoŭku infrastruktury pad hetyja kompleksy, faktyčnaha ich pieramiaščeńnia ŭ Biełaruś HUR nie zafiksavała.
Ahułam u vučeńniach płanujecca ŭdzieł kala 13 tysiač vajskoŭcaŭ.
Rasija pryciahnie da ich kala 3 tysiač čałaviek z Zachodniaj, Maskoŭskaj i Leninhradskaj akruhaŭ, Bałtyjskaha i Paŭnočnaha fłotaŭ, pavietrana-kaśmičnych i desantnych vojskaŭ. Ad Biełarusi buduć udzielničać ad 7 da 10 tysiač vajskoŭcaŭ. Taksama svaich vajskoŭcaŭ prysyłajuć Iran i Banhładeš, ale heta zusim nievialikija hrupy ahulnaj kolkaściu kala 145 čałaviek.
Pry hetym Rasija aficyjna zaprašała kantynhienty z 42 krain, ale tolki 36 pahadzilisia dasłać vajskovych pradstaŭnikoŭ u statusie dypłamataŭ. Kitaj, KNDR i Indyja admovilisia nakiroŭvać svaich vajskoŭcaŭ.
Takim čynam, HUR Ukrainy adznačaje, što prykmiet farmavańnia nastupalnaj hrupoŭki na terytoryi Biełarusi niama. Najbolš vierahodny scenar — pravierka hatoŭnaści orhanaŭ kiravańnia rasijskich akruhaŭ da płanavańnia i viadzieńnia bujnamaštabnych apieracyj na paŭnočna-zachodnim kirunku, ale hetym razam biez realnaj pahrozy susiednim krainam.
Ciapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club6
Kamientary