Były ministr abarony Rasii, sakratar Rady biaśpieki Siarhiej Šajhu apublikavaŭ kałonku ŭ «Rośsijskaj haziecie» pad zahałoŭkam «Afhanistan: ciarnisty šlach da stabilnaści». U joj Šajhu stanoŭča aceńvaje ruch «Taliban», jakija rasijskija ŭłady tolki ŭ krasaviku 2025 hoda vyklučyli sa śpisu terarystaŭ, piša Moscow Times.
Šajhu ličyć, što «Taliban» viadzie baraćbu z ekstremistami na svajoj terytoryi. «Kabuł rehularna likviduje bajevikoŭ IDIŁ. Viadoma, kali b nie ŭviedzienyja krainami Zachadu karnyja sankcyi suprać talibaŭ, hetaja baraćba była b bolš efiektyŭnaj», — napisaŭ jon.
Pa słovach Šajhu, Afhanistanu treba budzie jašče vialikaja praca dla stabilizacyi stanovišča ŭ krainie, a Rasija hatovaja akazvać talibam sadziejničańnie pa linii siłavych viedamstvaŭ.
«U Afhanistanie naličvajecca kala dvaccaci mižnarodnych terarystyčnych arhanizacyj ahulnaj kolkaściu bolš za 23 tysiačy bajevikoŭ, jakija ŭjaŭlajuć surjoznuju pahrozu dla rehijonu i śvietu», — piša jon.
Šajhu ŭskłaŭ adkaznaść na ciažkaści ŭ adnaŭleńni Afhanistana na zachodnija dziaržavy, nahadaŭšy, što $9 młrd dziaržreziervaŭ ŭrada talibaŭ zastajucca zamarožanymi, choć mohuć być nakiravany na vyrašeńnie prablem krainy. Taksama Šajhu zajaviŭ pra pravał amierykancami afhanskaj kampanii.
«Niearhanizavany vyvad vojskaŭ, jaki paciahnuŭ achviary siarod mirnych žycharoŭ, staŭ simvałam pravału administracyi Džo Bajdena i chaosu ŭ źniešniaj palitycy ZŠA pry demakratach», — napisaŭ jon. U paćvierdžańnie svaich słoŭ Šajhu pracytavaŭ ciapierašniaha prezidenta ZŠA Donalda Trampa, jaki nazvaŭ sychod z Afhanistana «samym haniebnym dniom u historyi ZŠA».
Šajhu taksama abvinavaciŭ ZŠA ŭ pavieličeńni vytvorčaści narkotykaŭ u Afhanistanie: «Maksimalnyja abjomy vytvorčaści apijataŭ pryjšlisia na druhi termin prezidenctva Baraka Abamy i da 2017 hoda dasiahnuli 9000 ton — u 43 razy bolš, čym da prychodu amierykancaŭ u Afhanistan». Šajhu adznačyŭ baraćbu talibaŭ z narkavytvorčaściu. Pavodle jaho słoŭ, užo ŭ 2023 hodzie płoščy pasievaŭ opiumnaha maku, jakija składali raniej kala 232 000 ha, skaracilisia na 95%, «na siońnia 20 z 34 pravincyj Afhanistana ličacca svabodnymi ad narkapłantacyj».
U červieni Rasija pieršaj u śviecie aficyjna pryznała isłamski emirat Afhanistan — dziaržaŭnaje ŭtvareńnie, jakoje kirujecca rucham «Taliban». Rasija pavysiła status dypłamatyčnych adnosin z Kabułam, i ŭ Rasii źjaviŭsia pasoł Afhanistana.
Kamientary