Kanada pierajšła na płastykavyja kupiury: vadastojkija, lehkapłaŭkija i niepalitkarektnyja

Kanada vypuściła pieršuju płastykavuju banknotu naminałam 100 kanadskich dalaraŭ u 2011 hodzie. Za joj vyjšli kupiury 50 i, narešcie, 7 listapada 2012 hoda, 20 kanadskich dalaraŭ. Płastykavyja hrošy nie źjaŭlajucca nou-chau kanadskaha nacbanka. Takija hrošy ŭpieršyniu źjavilisia ŭ 1988 hodzie ŭ Aŭstralii. Hrošy na płastykavaj ploncy drukujuć i ŭ Novaj Ziełandyi, i ŭ šerahu inšych krain śvietu.

Płastykavyja kupiury vałodajuć značnymi pieravahami nad papiarovymi: ich vielmi ciažka padrabić, jany znosaŭstojlivyja, na ich amal nie ŭtvarajecca zhinaŭ dy pry nieabchodnaści palimiernyja hrošy možna admyć. U litaralnym sensie hetaha słova. Ale kanadcy, jakija, vidać, nie źbirajucca pavalna kupacca z hamancami ŭ kišeniach, paśpieli znajści ŭ svaich novych banknotach i niekalki zahanaŭ.

Bank Kanady raskazvaje pra novyja kupiury 20 kanadskich dalaraŭ

Pa-pieršaje, jany płaviacca. Pra heta zajaviŭ budaŭnik z Antarya Nikałas Biłard, jaki pakłaŭ svaju kaladnuju premiju — 800 dalaraŭ, miž inšym — u blašanku z-pad kavy i pakinuŭ jaje pobač z radyjataram aciapleńnia. Nastupnaj ranicaj kupiury pieratvarylisia ŭ kamiački. Taksama žychary Kanady paviedamlali pra vypadki apłaŭleńnia kupiur, pakinutych u aŭtamabilach, jakija stajali na soncy ŭ śpiakotnaje nadvorje. Nacyjanalny bank Kanady admaŭlaje mahčymaść takich vypadkaŭ i zajaŭlaje, što płastyk dla kupiur prajšoŭ łabaratornyja vyprabavańni pry tempieraturach ad +140 da -75°S, ale śpiecyjalisty admovilisia nazyvać dakładnuju tempieraturu płaŭleńnia i paprasili kanadcaŭ nie ekśpierymientavać, piša Wall Street Journal.

«Test-drajv» płastykavaj kanadskaj banknoty

Pa-druhoje, novyja kupiury źlipajucca. Da taho ž, jany vielmi tonkija, možna vypadkova «raźvitacca» z dźviuma-tryma banknotami zamiest adnoj. Heta adbyvajecca praz nakapleńnie statyčnaj elektryčnaści, choć kanadski bank zajaŭlaŭ, što heta prosta «chvaroba» ŭsich novych kupiur, jakaja prachodzić z časam.

Pa-treciaje, mastak namalavaŭ nie toj klanovy list. Na hetuju asablivaść źviarnuŭ uvahu batanik Šon Błejni. Błejni kaža, što piacidolny list charakterny dla zaviezienaha ŭ Kanadu narviežskaha klona. Miascovy ž kanadski klon maje trochdolnyja listy (taki list namalavany na ściahu Kanady). Ale i tut nacbank nie źbirajecca ničoha źmianiać, bo «hety list adlustroŭvaje ŭsiu raznastajnaść klonaŭ u Kanadzie».

Darečy, dyzajn novych kanadskich dalaraŭ vyklikaŭ sprečki nie tolki siarod batanikaŭ, ale i prychilnikaŭ palityčnaj karektnaści. Tak, na makiecie 100-dalaravaj kupiury, dyzajn jakoj adlustroŭvaŭ miedycynskija dasiahnieńni Kanady (miedycyna ŭ krainie całkam biaspłatnaja, u adroźnieńnie ad Biełarusi), pieršapačatkova była namalovana žančyna manhałoidnaj rasy, jakaja hladzieła ŭ mikraskop. Na vypuščanaj kupiury azijatku zamianiła jeŭrapieoidka. U suviazi z hetym staršynia Banka Kanady byŭ vymušany aficyjna prasić prabačenie za «adlustravańnie tolki adnoj etničnaj hrupy» na kupiury.

Ale ŭ historyi hrošaj, napeŭna, luboj krainy jość padobnyja epizody. Biełaruś — nie vyklučeńnie. Tak, nadpis na kupiurach naminałam 50 000 rubloŭ staŭ hramatyčna niapravilnym paśla reformy pravapisu 2010 hoda: pa novych praviłach pačali pisać «piaćdziasiat», a nie «piaćdziesiat».

Na hetaj ža kupiury mikratekstam nadrukavana «MIRSKI ZAMAK». Supracoŭniki Nacbanka, adnak zajaŭlajuć, što heta była nie pamyłka, a hrafičnaja pastka dla falšyvamanietčykaŭ. A na kupiury 100 000 mastak prymalavaŭ viežam Niaśvižskaha pałaca pravasłaŭnyja kryžy zamiest arłoŭ. Pry hetym pamyłku, zroblenuju ŭ 2005, zaŭvažyli tolki ŭ 2012.

• 2
• 0
• 0
• 0
• 0
• 1
• 0
• 0