Яго не адкрыюць своечасова. Адкрыццё перанеслі на некалькі месяцаў.
З моманту высялення парафіі святога Сымона і святой Алены з Чырвонага касцёла ў Мінску 26 верасня прайшло чатыры гады. Да чарговай гадавіны закрыцця храма вернікі даведаліся, што рэканструкцыя касцёла не завершыцца ў студзені 2027 года, як гэта планавалася, паведамляе katolik.life.
Уласнік храма, дзяржпрадпрыемства «Мінская спадчына», таксама абяцаў, што асноўныя работы завершаць да канца 2026 года, а ў студзені будынак увядуць у эксплуатацыю.
Але цяпер вернікі заўважылі, што на пашпарце аб'екта змянілі дату. Тэрмінам заканчэння будаўніцтва ўжо значыцца не 31 студзеня, а 30 красавіка.
Цяперашні пробашч парафіі не ўзгадаў у парафіяльных аб'явах пра гадавіну закрыцця храма. Але гэта зрабіў экс-пробашч ксёндз Уладзіслаў Завальнюк і ў сваім відэа распавёў пра важныя дэталі.
Святар пацвердзіў, што пажару, які стаў падставай для высялення вернікаў з храма, папярэднічала разбітае акно. Гэта і шэраг іншых дэталяў могуць абвяргаць афіцыйную версію аб узгаранні праводкі — агонь мог быць наўмысна занесены звонку.
Дарэчы, вынікі расследавання аб узнікненні пажару і разбітым акне так і не былі прадстаўлены грамадскасці.
«Вернікаў выціснулі з храма», — сказаў экс-пробашч.
Таксама ён распавёў, што былы прадстаўнік Ватыкана ў Беларусі арцыбіскуп Антэ Ёзіч перадаваў з нунцыятуры для парафіі міні-электрастанцыю. Яе выкарыстоўвалі, калі ксёндз Уладзіслаў Завальнюк і парафіяне вялі малітоўнае дзяжурства ў плябаніі, доме святара побач з касцёлам. Ён быў адключаны ад электрычнасці, ацяплення і вады.
Але затым карыстацца міні-электрастанцыяй забаранілі. Як і «буржуйкай» пасля. Так вернікі перажылі дзве зімы, а ў выніку «з паслухмянасці шаноўнаму Мітрапаліту арцыбіскупу Юзафу [Станеўскаму]» пробашч і парафіяне «адступілі ад касцёла і плябаніі».
Цяпер святар заклікаў не губляць надзею і працягваць маліцца аб хутчэйшым завяршэнні рэканструкцыі і вяртанні вернікаў у храм.
Цяпер чытаюць
Намеснікам кіраўніка Адміністрацыі прэзідэнта стаў цвердалобы Муравейка, а Генштаб узначаліў генерал, які не вучыўся ў Расіі20
Намеснікам кіраўніка Адміністрацыі прэзідэнта стаў цвердалобы Муравейка, а Генштаб узначаліў генерал, які не вучыўся ў Расіі
Беларус-вахтавік на Ямале стварае песні на беларускай мове з дапамогай ШІ. «Раней музыка была закрытым клубам. Нейрасеткі адчынілі гэтыя дзверы з нагі»1616
Каментары