У Беларусі не працуе галоўная біржа грузаперавозак. Яе серверы стаялі ў Кіеве, куды цяпер б'е Расія
Lardi-Trans — буйная лагістычная платформа, якая звязвае перавозчыкаў і кліентаў. Як Uber, толькі для бізнэсу.
Заснавалі «Лардзі-Транс» украінцы з Харкава ў 1999 годзе. З 2017 года ў Беларусі працуе прадстаўніцтва — ТАА «ЛардзіБелТранс» у Гомелі. Біржа не спыніла работу з Беларуссю пасля пачатку вайны.
Беларусы карыстаюцца сайтам «Лардзі-Транс» прыкладна ў два разы часцей, чым сайтам асноўнага канкурэнта ў рэгіёне — расійскай ATI.su.
Паводле ацэнак сэрвісу Similarweb, за чэрвень—жнівень 2026 года беларускі сайт біржы наведалі каля 467 тысяч разоў, гэта прыкладна 155 тысяч візітаў штомесяц. Амаль усе (99,4%) — з Беларусі.
Але ўжо некалькі дзён як біржа замоваў лягла. На сайце вісіць заглушка, што платформа часова недаступна.
Не працуе не толькі беларуская версія. На галоўным сайце lardi-trans.com кампанія па-ўкраінску і па-англійску паведамляе, што праца адновіцца 29 верасня, і просіць прабачэння за нязручнасці. Не адкрываюцца і навінавы сайт кампаніі, і польская ды балгарская версіі.
Што менавіта здарылася, Lardi-Trans не тлумачыць. Але можна выказаць здагадку, што гэта звязана з нядаўнімі расійскімі бамбардзіроўкамі.
З пачатку верасня Расія сістэмна атакуе ўкраінскія дата-цэнтры і вузлы сувязі. Толькі за 23—27 верасня ў Кіеве былі пашкоджаныя «Парковы», дата-цэнтры Etherlink, «Датагруп» і Cosmonova. Без інтэрнэту заставаліся дзясяткі тысяч хатніх гаспадарак, з перабоямі працавалі тэлеканалы.
Паводле еўрапейскага рэестра інтэрнэт-адрасоў RIPE, у кампаніі ёсць уласная сетка ў кіеўскім дата-цэнтры «Воля».
Сувязь гэтага дата-цэнтру з інтэрнэтам абарвалася 23 верасня каля 16:30 па кіеўскім часе. У той дзень Расія двойчы ўдарыла дронамі па кангрэсна-выставачным цэнтры «Паркавы» ў Кіеве, дзе стаіць такое абсталяванне. Тэхнічнымі метадамі можна ўстанавіць, што серверы «Лардзі» дагэтуль не адказваюць.
На дадзены момант асноўнымі пацярпелымі ад сітуацыі ў Беларусі можна назваць невялія кампаніі і ІП, занятыя ў лагістыцы (у сферы транспарту працуе кожны пяты ІП у краіне), якія не маюць доўгіх кантрактаў на перавозкі. Для такіх перавозчыкаў «Лардзі» застаецца асноўнай крыніцай пошуку замоваў.
Той самы масажыст расказаў, навошта здымаў голых кліентак2
Каментары