Парламент М'янмы, які знаходзіцца пад кантролем вайсковых уладаў, прыняў новы закон аб барацьбе з інтэрнэт-махлярствам. Дакумент прадугледжвае смяротнае пакаранне для арганізатараў злачынных схем, якія прымушаюць людзей працаваць у так званых скам-цэнтрах — спецыяльных комплексах, дзе пад прымусам займаюцца інтэрнэт-махлярствам, піша Бі-бі-сі.
Такія цэнтры за апошнія гады шырока распаўсюдзіліся ў М'янме. Іх ахвярамі становяцца карыстальнікі інтэрнэту па ўсім свеце, якіх падманваюць праз фальшывыя рамантычныя знаёмствы, інвестыцыйныя прапановы і іншыя махлярскія схемы, у тым ліку звязаныя з крыптавалютамі.
Паводле паведамленняў людзей, якія вярнуліся з М'янмы, замежнікаў нярэдка прымушалі працаваць у такіх цэнтрах супраць іх волі. Іх утрымлівалі ў рабстве, падвяргалі катаванням і прымушалі ўдзельнічаць у інтэрнэт-махлярстве.
Пад ціскам міжнароднай супольнасці, у тым ліку ЗША і Кітая, улады краіны паабяцалі ўзмацніць барацьбу з гэтай злачыннай індустрыяй. Аднак дагэтуль паліцэйскія аперацыі і арышты ў асноўным прыводзілі толькі да перамяшчэння махлярскіх цэнтраў у іншыя раёны, а не да спынення іх дзейнасці.
Прыняты закон практычна без зменаў паўтарае праект, прадстаўлены яшчэ ў маі. Ён прадугледжвае пакаранне ад дзесяці гадоў пазбаўлення волі да пажыццёвага зняволення, а таксама смяротнае пакаранне за прымус людзей да ўдзелу ў інтэрнэт-махлярстве з выкарыстаннем гвалту, катаванняў або незаконнага ўтрымання.
Смяротнае пакаранне таксама прадугледжана для ўдзельнікаў злачынных груповак, калі іх дзеянні прывялі да гібелі пацярпелых. Асобы, якія кіруюць скам-цэнтрамі або арганізуюць махлярства з крыптавалютамі, могуць быць асуджаныя аж да пажыццёвага зняволення.
Гэта першы закон, прыняты новым урадам М'янмы на чале з Мін Аун Хлайнам. Ён узначаліў вайсковы пераварот у 2021 годзе, пасля якога было зрынута абранае цывільнае кіраўніцтва краіны і пачалася грамадзянская вайна. У красавіку 2026 года Мін Аун Хлайн стаў цывільным прэзідэнтам пасля выбараў, якія прайшлі без удзелу апазіцыі і былі раскрытыкаваныя заходнімі краінамі.
Паводле ацэнак экспертаў, парламент М'янмы цяпер фактычна зацвярджае ўсе рашэнні вайсковых уладаў, паколькі большасць яго членаў складаюць вайскоўцы.
Пасля прыходу да ўлады новага кіраўніцтва ў краіне аднавілася прымяненне смяротнага пакарання пасля доўгага перапынку. Праваабарончыя арганізацыі сцвярджаюць, што яно выкарыстоўваецца пераважна супраць праціўнікаў вайсковага рэжыму. Паводле даных ААН, ужо да 2022 года ў М'янме больш за 130 чалавек былі прысуджаныя да смяротнага пакарання.
У той жа час Кітай таксама ўзмацняе барацьбу з трансгранічным інтэрнэт-махлярствам. Паводле наяўнай інфармацыі, сёлета ў краіне былі пакараныя смерцю як мінімум 15 чалавек, асуджаных за махлярства, звязанае са скам-цэнтрамі ў М'янме.
У Кітаі пакаралі смерцю 11 членаў сіндыката Мін. Яны кіравалі скам-цэнтрамі і казіно ў М'янме
Што было ў апошніх галасавых паведамленнях Веры Краўцовай, якая знікла ў М'янме
Беларуска, вызваленая са скам-цэнтра ў М'янме: Нават калі збяжыш, невядома, каму званіць, там усё карумпавана
Хунта М'янмы правяла рэйд у адным з найбуйнейшых скам-цэнтраў. Сотні яго жыхароў уцяклі ў Тайланд
Армія М'янмы вызваліла 2198 чалавек з махлярскай скам-фабрыкі KK Park
Цяпер чытаюць
Адвакат Аляксандр Данілевіч: Мяне адвялі ў клетку на КПП і зачыталі ўказ для службовага карыстання пра памілаванне па просьбе Міжнароднага алімпійскага камітэта1010
Каментары