Адна з лакацый фестывалю сёлета носіць назву «Пад покрывам купальскай Берагіні». Гэты міфалагічны вобраз увасабляе жаночы пачатак, абарону і магічную сілу прыроды. Ён сімвалізуе сувязь з воднай стыхіяй і зёлкамі, ахоўваючы людзей ад нячыстай сілы.
Берагіню атаясамліваюць з Данай — уладаркай вод, якую шанавалі як светлую і добрую багіню, што дорыць жыццё ўсяму жывому.
Кожны раён Магілёўскай вобласці сёння прадставіў свой касцюм Берагіні і аксесуары да яго.
«На свяце заўсёды хочацца яшчэ больш здзіўляць гасцей, паказваць ім нашу культурную спадчыну, — расказаў загадчык філіяла «Раённы дом рамёстваў» Хоцімска Максім Мамчанка. — Сімвал «Купалля» — гэта Берагіня. І мы пастараліся паказаць усе нашы культурныя брэнды. Над стварэннем касцюма працавалі тры майстры. У аснове — ткацтва і вышыўка. Касцюм стваралі лёгкім, светлым. Бо, калі думалі пра тое, хто такая Берагіня, уяўлялася нешта лёгкае, паветранае. А яшчэ ў нас цудоўная мадэль — сапраўдны прыклад беларускай жанчыны. Касцюм прадстаўляе наша зямлячка, маці чатырох цудоўных дачок».
Каментары