Патрыярх Кірыл заклікаў праваслаўных святароў: «Работайте, братья!»
Выступаючы ў Брэсце, патрыярх Кірыл, кіраўнік Рускай праваслаўнай царквы, заклікаў праваслаўнае духавенства Расіі і Беларусі працаваць над умацаваннем веры ў мэтах «абароны Айчыны», і выкарыстаў пры гэтым мем, які звычайна прымяняецца ў дачыненні да супрацоўнікаў рэпрэсіўных сілавых структур.
«Звяртаючыся да нашага епіскапату, да духавенства, якое не толькі тут знаходзіцца, а да ўсяго епіскапату і духавенства, яшчэ і яшчэ раз хачу сказаць: «работайте, братья», — сказаў Кірыл.
«Наша будучыня — як народа, так і царквы — шмат у чым залежыць ад таго, як будзе сфарміравана свядомасць моладзі, наколькі яна будзе адданая Радзіме і царкве», — заявіў патрыярх.
Прыезд патрыярха Кірыла ў Брэст прымеркаваны да 85‑й гадавіны пачатку «Вялікай Айчыннай вайны». У ноч на 22 чэрвеня Кірыл наведае Брэсцкую крэпасць, дзе адслужыць літыю і далучыцца да традыцыйнага мітынгу-рэквіема.
Патрыярх Кірыл цесна звязаны са свецкімі расійскімі ўладамі і вядомы сваёй актыўнай, адкрытай і адназначнай падтрымкай развязанай Масквой кравапралітнай вайны ва Украіне.
Свядома выкарыстаная ім фраза «Работайте, братья!» актыўна выкарыстоўваецца ў Расіі і Беларусі найперш у мілітарысцкім і рэпрэсіўным кантэксце.
Упершыню яна з'явілася ў ліпені 2016 года ў расійскім Дагестане і звязаная з гібеллю малодшага лейтэнанта паліцыі Магамеда Нурбагандава. Калі баевікі-ісламісты захапілі яго ў палон і запатрабавалі, каб мужчына звярнуўся да сваіх калег і заклікаў іх пакінуць службу ў сілавых органах, Нурбагандаў паглядзеў у камеру і сказаў: «Работайте, братья!», пасля чаго быў застрэлены.
Пасля гэтая фраза была растыражаваная ды папулярызаваная пуцінскімі прапагандыстамі і ператварылася ў шырокі ідэалагічны штамп. Яна стала неафіцыйным дэвізам расійскіх сілавых структур (Расгвардыі, АМАПа, спецназа, паліцыі) і часта змяшчаецца на плакатах, банэрах і шаўронах. Гэтымі словамі расійскія вайсковыя блогеры, прапагандысты і ўвогуле прыхільнікі вайны і рэпрэсій падтрымліваюць і натхняюць сілавікоў.
Таму ў сучасным кантэксце выкарыстанне гэтай фразы ўспрымаецца як неад'емны элемент ваеннай прапаганды і мілітарызму. Яна часта ўжываецца пры ўхваленні жорсткіх дзеянняў сілавікоў пры разгоне мірных мітынгаў або ваенных злачынстваў. У тым ліку шырока гучалі і гучаць гэтыя словы для падбадзёрвання ўдзельнікаў рэпрэсіўных структур рэжыму Лукашэнкі.
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам24
Каментары