У выніку маштабнага ляснога пажару ў Зоне адчужэння зафіксавана павышэнне канцэнтрацыі цэзію каля ачагоў узгарання. Аднак эксперты супакойваюць: пагрозы для насельніцтва пакуль няма.
На поўначы Кіеўскай вобласці — буйны лясны пажар, які ахапіў больш за 1100 гектараў тэрыторыі Чарнобыльскай зоны адчужэння. З-за высокай тэмпературы і гарэння забруджанай драўніны радыёнукліды падняліся ў паветра.
Паводле даных Дзяржаўнай інспекцыі ядзернага рэгулявання Украіны, сітуацыя знаходзіцца пад пастаянным маніторынгам.
У пробах паветра, адабраных 8 мая на адлегласці 30—150 метраў ад ачагоў гарэння, утрыманне цэзію-137 дасягала 680 мкБк/м³ (або 0,00068 Бк/м³).
Гэтыя паказчыкі вышэйшыя за звычайныя кантрольныя ўзроўні для Зоны адчужэння, але яны застаюцца значна ніжэйшымі за гранічна дапушчальныя нормы радыяцыйнай бяспекі Украіны.
Спецыялісты Дзяржаўнага навукова-тэхнічнага цэнтра па ядзернай і радыяцыйнай бяспецы правялі мадэляванне распаўсюджвання паветраных мас.
«Магутнасць эквівалентнай дозы гама-выпраменьвання на бягучы момант знаходзіцца ў межах шматгадовых назіранняў на тэрыторыі Зоны адчужэння і ў межах фонавых ваганняў на ўсёй астатняй тэрыторыі краіны», — гаворыцца ў афіцыйным паведамленні ведамства.
Эксперты папярэджваюць, што з-за высокай тэмпературы прадукты гарэння падымаюцца ў высокія слаі атмасферы і могуць пераносіцца на вялікія адлегласці. У месцах іх выпадзення з дажджом або пылам магчыма кароткачасовае павышэнне фону, але гэта не нясе крытычнай пагрозы.
Па выніках 9 мая пажар у Чарнобыльскай зоне на ўкраінскім баку зусім не згас, хаця і моцна знізіў інтэнсіўнасць.
У найбольшай небяспецы знаходзіліся жыхары Хойніцкага, Брагінскага і Лоеўскага раёнаў 7 і 8 мая. У тыя дні сярод дзяцей і дарослых праводзіліся шматлікія масавыя мерапрыемствы ў гонар Дня Перамогі, у паветры адчуваўся пах гару, была бачная смуга.
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5757
Каментары