У Віцебску ўзаконяць і ўпарадкуюць сцежкі, пратаптаныя ў дварах самімі людзьмі
У Віцебску плануюць афіцыйна ўладкаваць так званыя «народныя сцежкі» — гэта дарожкі, якія жыхары самі вытоптвалі ў дварах для зручнасці. У межах новай праграмы «Сцежкавая сетка» ў 2026 годзе заасфальтуюць 159 такіх сцежак, піша sb.by.
Такія сцежкі з’явіліся на зялёных зонах паміж дамамі, і ўлады вырашылі не змагацца з імі, а наадварот — прыстасаваць пад рэальныя патрэбы людзей і зрабіць паўнавартаснымі пешаходнымі дарожкамі.
Агульная даўжыня гэтых маршрутаў складзе больш за 20 кіламетраў. Шырыня дарожак будзе каля 1,2 метра, а даўжыня — ад невялікіх участкаў прыкладна ў 40 метраў да больш за 500 метраў.
Праект закране ўсе раёны горада, а работы выканае мясцовае камунальнае прадпрыемства.
Акрамя гэтага, у Віцебску працягнуць і іншыя работы па ўпарадкаванні:
- у 102 дварах усталююць і адрамантуюць 159 спартыўных і дзіцячых пляцовак;
- у 48 дварах правядуць комплексны рамонт (новы асфальт, лаўкі, урны);
- плануюць высадзіць каля 700 дрэў і 500 кустоў.
Каментары