Спікер армянскага парламента: Арменія можа выйсці з АДКБ і ЕАЭС, калі Масква будзе ісці на абвастрэнне
Спікер парламента Арменіі Ален Сіманян адрэагаваў на інфармацыю пра жорсткія патрабаванні з боку прэзідэнта Расіі Уладзіміра Пуціна падчас перамоў з прэм’ер-міністрам Арменіі Ніколам Пашынянам і не выключыў, што гэта тэма можа мець для краіны далёкасяжныя наступствы.
Ален Сіманян падкрэсліў, што калі Масква сапраўды пойдзе на нейкія рэзкія крокі ў эканамічнай або палітычнай сферы, Арменія адкажа ўласным рашэннем. Сярод магчымых сцэнарыяў ён назваў нават выхад з Арганізацыі Дамовы аб калектыўнай бяспецы (АДКБ) і Еўразійскага эканамічнага саюза (ЕАЭС).
У той жа час палітык адзначыў, што не лічыць настолькі канфліктны сцэнарый верагодным. Паводле яго слоў, пасля абмеркаванняў паміж Уладзімірам Пуціным і Ніколам Пашынянам адбыўся «канструктыўны і прадуктыўны» дыялог, які дазваляе спадзявацца на вырашэнне спрэчных пытанняў без рэзкіх крокаў.
Асобна ён закрануў тэму цэн на газ. Паводле яго, такія перамовы паміж Арменіяй і Расіяй ідуць ужо доўгі час, і пытанне кошту энерганосьбітаў рэгулярна ўздымаецца. Ён адзначыў, што калі з’явяцца канкрэтныя дзеянні (напрыклад, павышэнне цэн), урад Арменіі афіцыйна гэта пракаментуе.
Сіманян таксама падкрэсліў, што Арменія не збіраецца дзейнічаць супраць Расіі і не вядзе варожай палітыкі. Але пры гэтым краіна будзе адстойваць свае нацыянальныя інтарэсы — гэта значыць, што ў любым супрацоўніцтве Арменія будзе старацца атрымаць выгадныя для сябе ўмовы:
«Падобныя размовы ўжо вяліся, і калі мы дойдзем да таго, што ўбачым якія-небудзь дзеянні, звязаныя з гэтым, я або прадстаўнік урада пракаментуем сітуацыю. Мы нічога не рабілі супраць Расіі, нічога не робім і нічога не будзем рабіць, але ў той жа час будзем абараняць інтарэсы Рэспублікі Арменіі».
«Мы самі прымем гэта рашэнне». Пуцін у Крамлі паставіў перад Ніколам Пашынянам пытанне рубам, той трымаўся годна
Пашынян папрасіў звольніцца дырэктарку Інстытута генацыду армян, бо яна зрабіла палітычна няправільны падарунак віцэ-прэзідэнту ЗША
ЗША накіруюць у Арменію больш за 13 мільярдаў даляраў інвестыцый. Гэта амаль палова яе гадавога ВУП
Каментары