«Гэта жорсткі эксперымент». Кур'ер даставіў мінчанцы букет у дзень нараджэння, а праз 10 хвілін забраў яго
Беларуская мастачка Наталля Мядзведзь распавяла ў Threads, як дастаўка кветак «Розы.бел» сапсавала ёй святочны настрой у дзень нараджэння.
«Кур'ер з «Розы.бел» прывёз мне букет, а праз 10 хвілін забраў яго. Пераблытаў. Дык вось, дарагія «Розы.бел», з дзяўчатамі так паступаць нельга. Нельга дарыць кветкі і забіраць іх. Гэта жорсткі эксперымент над псіхікай у яе ж дзень», — напісала Наталля пра непрыемны выпадак у Threads.
Тыя кветкі, якія прызначаліся канкрэтна ёй, мастачка ў выніку атрымала — кур’ер замяніў, — але настрой быў безнадзейна сапсаваны.
Яшчэ адна дзяўчына ў каментарах распавяла, што трапіла ў аналагічную сітуацыю з той самай дастаўкай: «У мяне таксама такая сітуацыя была з «Розы.бел». Хлопец вырашыў мяне парадаваць знаходзячыся далёка, проста так сюрпрызам замовіў букецік. Кур'ер прыносіць шыкоўны букет, я паспяваю сфатаграфаваць і адпісацца хлопцу з захапленнем. Разумею, што фота букета яго здзівіла… Праз пару хвілін кур'ер вярнуўся і кажа, што пераблытаў. Замяніў мне на той, што замовіў мой хлопец, добры букет але ў разы менш памерам атрымліваецца… Мне дык у любым выпадку прыемная проста ўвага хлопца, а яму няёмка было, знерваваўся».
Шмат хто ў каментарах напісаў, што ў такой сітуацыі адмовіўся б аддаваць кветкі. Нехта палічыў, што праблема ў тым, што першы букет быў больш шыкоўным. Наталля ж сцвярджае: яе букет ёй спадабаўся больш.
Пасля допісу ў Threads, які набраў больш за 20 тысяч праглядаў, з Наталляй звязалася прадстаўніца «Розы.бел». Тая яшчэ раз папрасіла прабачэння за памылку кур’ера.
Але Наталля лічыць, што простае «выбачайце» — гэта этычны правал, бо кампанія не звяртае ўвагі на пачуцці кліента. Кур'ера ёй шкада, але «прафесіяналізм гэта не адсутнасць памылак, а правільныя дзеянні пасля іх». Жанчына піша, што падарыць і забраць — гэта прыблізна як папрасіць прабачэння, ударыўшы па твары. Таму, на яе думку, было б правільна пакінуць абодва букеты.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары