Што ўяўляюць сабой сухпайкі ў беларускім войску і за што іх крытыкуюць і хваляць?
Калі хочаце есці «як у войску на вучэннях», дык можаце: усё знойдзеце ў звычайнай краме.
Фармаваннем сухпайкоў для беларускага войска займаецца 1068‑я харчовая база, што месціцца ў Гарадзішчы (Мінскі раён).
Склад вайсковых сухпайкоў публікаваў тэлеграм-канал «Я-военный.бел».
Агульнавайсковы рацыён выглядае так: печыва зацяжное або крэкер з пшанічнай мукі (або галеты, хлябцы), печыва салодкае (або вафлі), кансервы мясныя (тушонка), кансервы рыбныя, кансервы мяса-раслінныя, цукар, гарбата, карамель, харчовы гематаген або садавінна-збожжавы батончык, сок з садавіны. Энергетычная каштоўнасць такога сухпайка складае аж 3890 калорый — для моцных нагрузак.
У рацыён харчавання асабовага складу дэсантных падраздзяленняў дадаюць каву ды шакалад. Тут ужо каларыйнасць атрымліваецца 4008 калорый.
Рацыён харчавання падраздзяленняў спецыяльнага прызначэння амаль такі самы па складзе, але ўжо разлічаны на 4730 калорый.
Агляд на сухпаёк армейскага спецназа рабіў мазырскі ютуб-блогер Сяргей Цярэшчанка. Сцвярджае, што беларускі сухпаёк яму даслаў нехта з падпісчыкаў.
Набор ежы такі: тушонка Жлобінскага мясакамбіната, ячная каша з ялавічынай Слонімскага мясакамбіната (дзве бляшанкі), балтыйская кілька ў таматным соусе, тры пачкі галет, пачак салодкага печыва (пяць штук), чатыры пакуначкі чорнай гарбаты Kali laska, гематаген, маленькая шакаладка «Алёнка», восем пакуначкаў цукру (па 10 грам) і чатырнаццаць ледзянцоў. Чамусьці не знайшлося соку, які мусіў быць.
Абурыла блогера тое, што яму ў набор трапіла дзве аднолькавыя бляшанкі — груца з ялавічынай. Маўляў, чаму нельга было пакласці розныя — напрыклад, рыс ці грэчку.
Не спадабалася мужчыну і тое, што на бляшанцы з тушонкай не было адрыўнога кольца. Не знайшлося яго і на кільцы, то-бок адкрываць яе вельмі нязручна. Як кажа Сяргей, хочаш нажом, а хочаш зубамі.
Раскрытыкаваў ён і сам пачак, у якім ляжаў сухпаёк. Таму што зроблена ён са звычайнага кардону, які лёгка і хутка распаўзецца ад вільгаці (для параўнання: нават расійскі сухпаёк надзейна запакаваны ў герметычны пластыкавы пакет). Наогул, усё пакаванне ў наборы Сяргей заве несучасным. Напрыклад, войскі заходніх краін даўно выкарыстоўваюць рэторт-пакеты замест вялікіх, цяжкіх і нязручных бляшанак.
— Дзе лыжкі? Чым салдат будзе есці? Штык-нажом? Ну няўжо наша беларуская прамысловасць не можа надрукаваць тэрмапластаўтаматамі добрай якасці лыжкі? Не тыя, якія кладуць у сухпаек расійскай арміі — яны ламаюцца, а моцныя, добрыя.
Плюс, які пабачыў блогер, — гэта якасць прадуктаў. Маўляў, ён сам набываў у краме такія кансервы і ўпэўнены ў тым, што мяса ў бляшанках сапраўды можна знайсці.
Але ж да смаку ёсць пытанні. Блогер сцвярджае, што есці кашы халоднымі ўсё ж непрыемна, а нічога для таго, каб пагрэць іх, ён не знайшоў.
— Вось скажыце, што, вайсковец павінен вогнішча раскласці? Так яго ўбачыць любы дрон з цеплавізарам.
Галеты Сяргей увогуле называе ненавіснымі і цікавіцца, чаму ж у Беларусі нельга зрабіць кансерваваны хлеб (у натаўскіх сухпайках ён ёсць).
Раней агляд на сухпаёк беларускага войска рабіў блогер і інструктар па стральбе з Дагестана Марат Сутаеў. У яго наборы была груца з ялавічынай ды грэчка з ялавічынай. Соку таксама не было, затое знайшлася кава.
Першае, што здзівіла Марата — адсутнасць прадметаў для таго, каб можна было падагрэць ежу (у інтэрнэце можна знайсці інфармацыю, што ў некаторых беларускіх сухпайках сухое паліва з падстаўкай). Таму яму прыйшлося браць неабходнае з расійскага сухпайку.
Ён кажа, што есці кансервы можна і халоднымі, але цёплымі ўсё ж значна смачней. На адсутнасць лыжкі блогер таксама звярнуў увагу, але дастаў сваю.
Уразіла Марата тое, як шмат мяса ў беларускіх кашах. Кажа, што вельмі смачна. З тушанінай ён зрабіў бутэрброд на галеце.
— Я б з задавальненнем пайшоў у беларускае войска, каб есці такі сухпаёк. Жартую.
Агулам рацыён Марату спадабаўся. Маўляў, нічога лішняга.
На СТБ у 2023 годзе таксама вырашылі параўнаць сухпайкі Беларусі, Расіі і краін НАТА.
Журналіст актыўна расхвальваў айчынныя кансервы — пераконваў, што ў свеце гэта ўжо эксклюзіў: «Беларусь — адзіная краіна постсавецкай прасторы, якая захавала легендарную бляшанку ў сваіх сухпайках».
Але адзначыў: у Расіі рацыён больш разнастайны — ёсць рагу з гародніны, курыны паштэт, яблычныя пюрэ і фруктовыя напоі. Нават жуйку паклалі.
Галоўнае адрозненне амерыканскага сухпайка — ён разлічаны на адзін прыём ежы (беларускі і расійскі — адразу на ўвесь дзень).
«З асноўнага — тушаная курыца ў таматным соусе і з сырам фета, кукурузная запяканка. Ёсць хлеб, але не як галета, а такі, як нават для касманаўтаў бяруць. Ёсць сыр плаўлены — ён ёсць і ў расійскіх калег. Потым карамельна-яблычная нуга. Капучына. А далей аднаразовы посуд і сродкі гігіены».
У амерыканскім сухпайку знайшлі беспалымяны награвальнік ежы — унутр яго неабходна заліць ваду. У сюжэце сцвярджалася, быццам і ў беларускім знаходзіцца аналагічны. Расійскі варыянт журналіст раскрытыкаваў.
Не спадабалася яму і расійская грэчка з ялавічынай — кажа, смак мяса зусім не адчуваецца. Беларуская кансерва — ну зусім іншы смак.
Дарэчы, цяпер сухпаёк расійскага вайскоўца можна спакойна набыць на «Куфары» ўсяго за 33 рублі, а амерыканскага — за 80 рублёў.
Каментары
В Германии и Австрии, где я живу последние годы, не умеют делать тушенку. Крупнокусковой вообще нет.
В Западной Германии один из крупнейших производителей Dreistern делает тушенку явно из мяса машинной обвалки, просто спрессованная масса мелких кусочков. Немцы расхваливают в рецензиях на Амазоне, наверное , не привыкли к другому, хотя есть и мнения, что даже собаки от такого отворачиваются.
В Австрии тушенка похожа на паштет.
Лишь в бывшей Восточной Германии делают нормальную по вкусу тушенку (наверное, технологии Восточного блока), но тоже не крупнокусковая.