Кампанія Ілана Маска SpaceX адмяніла абаненцкую плату за спадарожнікавы інтэрнэт Starlink у Іране — на фоне поўнай блакады інтэрнэту, якую ўлады ўвялі шэсць дзён таму для падаўлення пратэстаў.
Пра гэта паведамляе Bloomberg са спасылкай на выканаўчага дырэктара амерыканскай арганізацыі Holistic Resilience Ахмада Ахмадзіяна. Афіцыйна Starlink не каментаваў гэтую інфармацыю.
Выкарыстоўваць прыёмнікі Starlink у Іране афіцыйна забаронена, але актывісты кантрабандай перапраўляюць абсталяванне праз мяжу, нягледзячы на рызыкі. Паводле ацэнак Ахмадзіяна, у краіне цяпер больш за 50 тысяч такіх прылад.
«З першага дня мы бачылі відэа з усіх куткоў краіны. Людзі прыдумлялі арыгінальныя спосабы дзяліцца прапускной здольнасцю Starlink — стваралі сістэмы, якія дазваляюць людзям за межамі Ірана звязвацца са сваімі сем’ямі», — распавёў Ахмадзіян FT.
Каментары