Гэта ў два разы болей, чым летась.
За 2025 года «Байсолу» ўдалося сабраць больш за 1,25 мільёна еўра дапамогі. Фонд адзначае, што гэта пакуль папярэднія падлікі.
Гэтая лічба ўключае і персанальныя зборы, і зборы «Байсол» (напрыклад, дзіцячы збор), а таксама зборы на ініцыятывы. Агулам у 2025 годзе атрымалася закрыць каля 250 персанальных збораў, у тым ліку, 12 для беларускіх добраахвотнікаў ва Украіне. І колькасць ахвяраванняў, і сярэдняя іх сума павялічыліся, адзначае фонд.
У 2025‑м былі два вялікія экстраныя зборы для вызваленых палітвязняў. Кожны з іх стаў рэкордным: 111 тысяч еўра падчас першага збору і 260 тысяч еўра падчас другога. Абодва зборы былі закрытыя вельмі хутка, а сабраныя сумы ўдвая перавысілі пастаўленыя мэты.
За год каманда эвакуацыі «Байсола» правяла 140 кейсаў.
У 2025 годзе было зроблена таксама амаль 500 выплат палітвязням пасля вызвалення — гэта грошы, каб тэрмінова купіць сезонныя рэчы, лекі ці кампенсаваць іншыя жыццёва неабходныя выдаткі.
У 2025 годзе фонд падтрымаў 10 праектаў ініцыятыў міні-грантамі на агульную суму амаль 37 тысяч еўра. А гарачая лінія апрацавала больш за 2 тысячы запытаў рознай складанасці.
У 2024‑м фонд сабраў больш за 619 тысяч еўра.
Каментары