Зяленскі: Украіна хоча атрымаць ад ЗША гарантыі бяспекі на 30—50 гадоў, Трамп абяцаў падумаць
Прэзідэнт Украіны Уладзімір Зяленскі заявіў, што Кіеў зацікаўлены ў доўгатэрміновых гарантыях бяспекі з боку Злучаных Штатаў — на 30, 40 або нават 50 гадоў. Пра гэта ён расказаў падчас анлайн-размовы з журналістамі, вяртаючыся з ЗША ў Еўропу, паведамляе «Еўрапейская праўда».
Са слоў Зяленскага, напярэдадні на перамовах з прэзідэнтам ЗША Дональдам Трампам было пацверджана, што Украіна атрымае моцныя гарантыі бяспекі ад Вашынгтона. Аднак цяпер яны замацаваныя ў дакументах на 15 гадоў з магчымасцю далейшага падаўжэння.
Зяленскі адзначыў, што падняў гэтае пытанне непасрэдна перад Трампам, падкрэсліўшы, што вайна ва Украіне доўжыцца ўжо амаль 15 гадоў, таму краіне патрэбныя значна больш працяглыя абавязацельствы ў сферы бяспекі.
Ён заявіў, што Украіна хацела б разгледзець варыянт гарантый тэрмінам на 30—50 гадоў, што магло б стаць гістарычным рашэннем для прэзідэнта ЗША.
Са слоў Зяленскага, Дональд Трамп адказаў, што возьме гэтую прапанову на разгляд.
Таксама паведамляецца, што прэзідэнт Францыі Эмануэль Макрон анансаваў сустрэчу краін так званай «кааліцыі ахвотных», якая павінна адбыцца ў пачатку студзеня ў Парыжы. На ёй плануюць канчаткова ўзгадніць унёсак кожнай дзяржавы ў сістэму гарантый бяспекі для Украіны.
28 снежня Зяленскі і Трамп правялі сустрэчу ў Фларыдзе, дзе абмяркоўвалі мірныя ініцыятывы. Пры гэтым Трамп адразу заявіў, што пасля размовы з украінскім лідарам плануе патэлефанаваць Уладзіміру Пуціну.
Цяпер чытаюць
У Беларусі множацца пляцоўкі для танцаў на свежым паветры — паглядзіце, як адпальваюць разам моладзь і пенсіянеры ў Серабранцы11
Каментары