Стаў вядомы поўны спіс 18 фігурантаў «малочнай справы», падзельнікаў міністра Брыло і братоў Скітавых

Праз два гады пасля першых арыштаў у Мінскім гарадскім судзе пачаўся разгляд «малочнай справы».

Цэнтральныя фігуры: былы кіраўнік «Бабулінай крынкі» Генадзь Скітаў (ранейшае прозвішча Элькінд) і ягоны брат Сяргей Элькінд, а таксама былы памочнік Лукашэнкі па Віцебскай вобласці і міністр сельскай гаспадаркі Ігар Брыло.

Сэнс справы ў тым, што быццам бы Скітавы пры спрыянні Брыло разгарнулі на дзяржаўнай «Бабулінай крынцы» сістэму, пры якой штучна стваралася затаваранасць складаў, што дазваляла для іх разгрузкі адпускаць прадукцыю па ніжэйшай цане. Потым гэтае, у рэальнасці добрае малако і іншыя прадукацыя па дэмпінгавых цэнах адгружалася на фірмы-пасярэднікі, якія прадавалі ў Расіі па рэальнай цане. А розніца, адпаведна, дзялілася паміж удзельнікамі схемы. 

Апроч цэнтральных фігурантаў, на лаве падсудных:

— Віктар Скітаў, сын Генадзя Скітава, дырэктар філіяла «Мінскі» «Бабулінай крынкі».

— Арцём Зубель, першы намеснік дырэктара «Бабулінай крынкі», сын былога намесніка начальніка шчучынскай міліцыі.

— Галіна Ціцянкова, намесніца дырэктара «Бабулінай крынкі», пасля ўзначаліла гаспадарку «Новая Друць» у Бялыніцкім раёне.

— Аляксей Драніца, начальнік аддзела знешнеэканамічнай дзейнасці «Бабулінай крынкі». 

— Дзяніс Ліннік, дырэктар філіяла «Асіповіцкі» «Бабулінай крынкі», былы начальнік Барысаўскага РУУСа.

— Сяргей Петражыцкі, дырэктар «Віцебскмясмалпрама».

— Уладзімір Сіруць, «галоўны сябар» Генадзя Скітава, кіраўнік шэрагу афіліяваных кампаній.

— Сяргей Качанаў, дырэктар віцебскага канцэрна «Мяса-малочныя прадукты»

— «Николаевич М. В». — поўны цёзка Міхаіла Валянцінавіча Нікалаевіча, былога намесніка старшыні праўлення «Тэхнабанка» і намесніка дырэктара салігорскага футбольнага «Шахцёра».

— Уладзімір Лісіцын, заснавальнік «БелАграГен Беларусь».

Яшчэ пра пяць чалавек дакладна не вядома, чым яны займаліся на свабодзе: А. Чарняк, А. Яшчанка, Г. Кіракасян, А. Сабалькоў, А. Панкоў.

Агулам тут 18 чалавек, хаця напачатку справы КДБ заяўляла, што фігурантаў 26. Называліся таксама кампаніі ў схеме, апроч «Бабулінай крынкі»: Полацкі малочны камбінат, Віцебскі мясакамбінат, Слуцкі сыраробны камбінат, Рагачоўскі МКК, Мяса-малочная кампанія; а таксама прыватныя «Смак сезону», «Белмалгандаль», «Несцярэмбел», «ТПК ПрадІнвест», «Ірмол», «Мілкпрофтрэйдзінг», «ПТК», «Эгіда». Большасць гэтых кампаній працягваюць работу. 

Падчас следства с СІЗА выходзілі навіны, што браты Элькінды-Скітавы як былыя прадстаўнікі крымінальнага свету не давалі ніякіх паказанняў, у той час як Ігар Брыло «беспардонна грузіў сябе і іншых». 

Чытайце таксама: «Цябе б бацька пракляў»: маці фігуранта «малочнай справы» прабілася на спатканне з ім, каб слёзна папрасіць не супрацоўнічаць са следствам

Чытайце таксама: «Грузіць сябе і іншых»: былы памочнік Лукашэнкі Ігар Брыло бярэ на сябе віну ў прамысловых аб'ёмах

Фігуранты праходзяць па 12 артыкулах крымінальнага кодэксу: 

• Артыкул 430 ч. 2 — атрыманне хабару, ад 3 да 10 гадоў пазбаўлення волі;
• артыкул 426 ч. 3 — перавышэнне ўлады пры цяжкіх наступствах, ад 3 да 10 гадоў пазбаўлення волі;
• артыкул 430 ч. 3 — атрыманне хабару, ад 5 да 15 гадоў пазбаўлення волі;
• артыкул 209 ч. 1 — махлярства, штраф, грамадскія работы, арышт альбо абмежаванне волі да 3 гадоў, альбо пазбаўленне волі да 3 гадоў;
• артыкул 431 ч. 3 — дача хабару, ад 5 да 10 гадоў пазбаўлення волі;
• артыкул 426 ч. 2 — перавышэнне ўлады, ад 2 да 6 гадоў пазбаўлення волі;
• артыкул 424 ч. 2 — злоўжыванне ўладай, ад 2 да 6 гадоў пазбаўлення волі;
• артыкул 431 ч. 1 — дача хабару, штраф, выпраўляльныя работы да 2 гадоў, арышт або абмежаванне волі да 2 гадоў, альбо пазбаўленне волі да 5 гадоў;
• артыкул 424 ч. 3 — злоўжыванне ўладай, ад 3 да 10 гадоў пазбаўлення волі;
• артыкул 210 ч. 4 — махлярства ў асабліва буйным памеры або арганізаванай групай, ад 3 да 10 гадоў пазбаўлення волі з магчымай канфіскацыяй;
• артыкул 432 ч. 2 — пасрэдніцтва ў хабары, арышт або абмежаванне волі да 5 гадоў, альбо пазбаўленне волі да 6 гадоў;
• артыкул 210 ч. 3 — махлярства ў буйным памеры, ад 2 да 7 гадоў пазбаўлення волі.

Невядома, каму з фігурантаў інкрымінуюцца якія артыкулы.

• 0
• 0
• 1
• 0
• 0
• 0
• 0
• 0