«Вы бароніце не толькі сваю зямлю — вы бароніце права ўсіх людзей жыць у свабодзе». Ціханоўская — да Дня Незалежнасці Украіны
Святлана Ціханоўская павіншавала народ Украіны і прэзідэнта Уладзіміра Зяленскага з Днём Незалежнасці.
«Вашая стойкасць і адвага сталі светлым прыкладам для ўсяго свету. Але асабліва — для беларусаў», — гаворыць Ціханоўская.
Яна падкрэслівае, што ўкраінцы змагаюцца не толькі за сваю краіну: «Вам даводзіцца плаціць найвышэйшую цану за сваю незалежнасць. Але вы бароніце не толькі сваю зямлю — вы бароніце права ўсіх людзей жыць у свабодзе».
Ціханоўская кажа, што без свабоднай Украіны не будзе свабоднай Беларусі, як і без свабоднай Беларусі не будзе бяспечнай Еўропы.
«Мы разумеем ваш боль. Мы падтрымліваем вашу барацьбу. Беларусы і беларускі — побач з вамі. З вамі нашыя добраахвотнікі на фронце, нашыя валанцёры і актывісты. Беларусы з усяго свету ахвяруюць сродкі. А ў турмах лукашэнкаўскага рэжыму — сотні беларусаў, якія пацярпелі за падтрымку Украіны. І мы працягваем змагацца за іх вызваленне.
У нас з Украінай адзін і той жа вораг. Расійскі імперыялізм прынёс вайну на вашую зямлю і зрабіў Беларусь закладніцай супраць волі беларускага народа.
Але мы ведаем: вашая перамога дасць шанец на свабоду і Беларусі. Без свабоднай Украіны не будзе свабоднай Беларусі. Гэтаксама як і без свабоднай Беларусі не будзе бяспечнай Еўропы», — падкрэслівае яна.
Ціханоўская выказвае спадзеў, што ў беларусаў і ўкраінцаў не толькі слаўная гісторыя, але і супольная будучыня — у еўрапейскай сям’і свабодных народаў.
«І сёння, у ваш дзень Незалежнасці, зычу вам сілы, каб выстаяць і адстаяць свабоду. Зычу вам трывалага і справядлівага міру, які ўкраінскі народ безумоўна заслугоўвае. Жыве Беларусь! Слава Украіне!»
Цяпер чытаюць
Беларус набыў кватэру ў Іспаніі, але яе занялі акупасы. Цяпер ён не можа яе вярнуць12
Каментары