Цяпер электрасамакаты і веласіпеды трэба рэгістраваць. Якія і як гэта зрабіць?
Новыя правілы будуць дзейнічаць з наступнага месяца.
З 1 верасня ў Беларусі ўступаюць у сілу змены ў Правілах дарожнага руху, якія тычацца веласіпедыстаў, карыстальнікаў электрасамакатаў і іншых сродкаў персанальнай мабільнасці (СПМ). Як рэгістраваць тыя веласіпеды і самакаты, якія трапяць у катэгорыю транспартных сродкаў, расказалі ў Нацыянальным прэс-цэнтры, піша Office Life.
Цяпер чалавека, які едзе на СПМ, перакваліфікуюць з пешахода ў веласіпедыста. Пры гэтым, калі такі самакат мае максімальную канструктыўную хуткасць вышэй за 25 км/г і масу больш за 35 кг, прыйдзецца пацвердзіць тып транспартнага сродку, аформіць на яго электронны пашпарт і зарэгістраваць у ДАІ.
Выключэннем стане выкарыстанне самаката ці веласіпеда на дарогах без удасканаленага пакрыцця ў светлы час сутак па абочыне дарогі або пры яе адсутнасці па праезнай частцы дарогі не далей метра ад яе правага краю.
Для атрымання электроннага пашпарта сродак павінна адпавядаць тэхнічным патрабаванням, устаноўленым Мытным саюзам. Гэта азначае, што самакат ці ровар павінен быць аналагам мапеда або матацыкла і мець такія элементы, як люстэрка задняга выгляду, спідометр, паваротнік, сігнальныя агні і іншыя канструктыўныя элементы.
Калі вы купілі СПМ, які фактычна з'яўляецца транспартным сродкам, і ў вас ёсць дакументы, якія пацвярджаюць яго адпаведнасць стандартам, вы можаце ўжо цяпер звярнуцца па атрыманне электроннага пашпарта і зарэгістраваць прыладу ў ДАІ. Рэгістрацыя ў ДАІ абыдзецца ў 2 базавыя велічыні (84 рублі).
У іншых выпадках трэба звярнуцца ў лабараторыю для вызначэння катэгорыі вашага транспарту. Да 25 жніўня на сайце Дзяржстандарту з'явіцца спецыяльная ўкладка з памяткай, якая дапаможа самастойна высветліць, ці адносіцца ваш СПМ да транспартных сродкаў і ці трэба вам праходзіць перакваліфікацыю. Колькі будзе доўжыцца працэдура праверкі і яе кошт, пакуль не ўдакладнілі.
Арыштаваны дырэктар Палаца Рэспублікі, адзін з арганізатараў Марафона адзінства9
Каментары