Ціханоўская: Трампу вельмі цяжка мець справу з Расіяй, але Беларусь для яго — як нізка вісячы фрукт
Лідарка апазіцыі Святлана Ціханоўская спадзяецца на нацыянальны дыялог і падтрымку Трампа ў гэтым. Брытанскае выданне The Sunday Times апублікавала вялікі артыкул з нагоды вызвалення яе мужа Сяргея Ціханоўскага.
Вызваленне зняволеных было часткай пагаднення, заключанага пры пасрэдніцтве ЗША, згодна з якім Аляксандр Лукашэнка быў узнагароджаны сустрэчай у той жа дзень са спецпрадстаўніком Дональда Трампа Кітам Келагам. Сустрэчу паказалі па дзяржаўным тэлебачанні.
Але і цяпер застаецца незразумелым, чаму Лукашэнка вырашыў вызваліць чалавека, які так бязлітасна крытыкаваў яго ў сваіх відэа. Сярод 14 вызваленых большасць мелі замежныя пашпарты, у турмах яшчэ прыблізна 1100 іншых палітычных зняволеных, сярод іх, як мяркуецца, ёсць два брытанцы, імёны якіх не былі апублічаныя.
Адна з тэорый заключаецца ў тым, што Лукашэнка мог лічыць, што, вызваліўшы Ціханоўскага — такую значную фігуру — ён справакуе рознагалоссі паміж парай і апазіцыяй.
Яшчэ адна з версій — што Лукашэнка спрабуе пасеяць разлад улады ў самой пары.
Ціханоўская імкнецца даказаць, што ўлады памыляюцца. Яе муж, хоць і «прыроджаны лідар», зойме ролю «першага джэнтльмена», лічыць яна:
«Ён цалкам паважае, разумее і прымае тое, што я абраны прэзідэнт Беларусі. Я не бачу паміж намі ніякай канкурэнцыі».
«Па сваёй прыродзе я не магу рабіць дыпламатычную працу, як мая жонка, — дадае Ціханоўскі. — Яна больш спакойная, больш практычная і мае досвед, якога ў мяне няма».
Ён кажа, што аднавіў кар'еру відэаблогера:
«Мая мэта — зрабіць канкрэтныя крокі, каб гэты рэжым разваліўся».
Франак Вячорка, старэйшы дарадца Ціханоўскай, лічыць, што Лукашэнка моцна пралічыўся — гэтак жа, як і тады, калі дазволіў Святлане балатавацца супраць яго ў 2020 годзе, высмейваючы яе як маленькую дзяўчынку.
Пакуль Ціханоўскі быў у турме, у Святланы былі падставы стрымліваць свае словы і дзеянні з-за боязі за мужа:
«Цяпер у іх больш няма такіх рычагоў уплыву», — сказаў Вячорка.
Ціханоўскія расказалі выданню, што яны спадзяюцца заахвоціць тых беларусаў, хто вагаецца, далучыцца да нацыянальнага дыялогу — падобнага да таго, які паклаў канец камунізму ў Польшчы ў канцы 1980-х. «Мы не пагражаем павесіць іх [улады] на слупах асвятлення, — сказала яна. — Мы кажам ім, што Лукашэнка калісьці памрэ, і ім трэба падумаць пра сябе».
Натхнёная візітам Келага, Ціханоўская і яе прыхільнікі спадзяюцца, што ЗША дапамогуць зрабіць гэта рэальнасцю, піша выданне.
Хоць пара яшчэ не размаўляла з прэзідэнтам Трампам, яны хацелі б сустрэцца з ім — хаця б каб падзякаваць за вызваленне Ціханоўскага.
«Трампу вельмі цяжка мець справу з Расіяй, але Беларусь — гэта нізка вісячы фрукт, — сказала яна. — Беларускі народ аб’яднаны вакол ідэі пераменаў. Трамп мае ўладу і рычагі, каб ажыццявіць гэта».
Каментары