«Атрымліваем абрыўкі інфармацыі, у нас няма сувязі». Сястра Марыі Калеснікавай расказала апошнія навіны пра яе

Паводле слоў Таццяны Хоміч, пасля сустрэчы палітзняволенай з бацькам у лістападзе мінулага года сям’я даведалася, што Марыю Калеснікаву перавялі ў 18-ы атрад у гомельскай калоніі, дзе цяпер яна знаходзіцца сярод іншых зняволеных жанчын. Паводле інфармацыі сям’і, у атрадзе мала або зусім няма палітвязняў.

«Гэта такі спецыфічны атрад, дзе знаходзяцца жанчыны з больш сур’ёзнымі парушэннямі», — адзначыла Таццяна Хоміч.

Паводле яе слоў, сям’і вядома, што Марыя, як і раней, працягвае працаваць на швейнай фабрыцы. Перадачы для яе па-ранейшаму не прымаюць. Таксама сям’я не можа рабіць ёй грашовыя пераводы ў калонію, таму Марыя не можа нічога набыць у мясцовай краме, паведаміла сястра палітзняволенай.

Таксама вядома, што яе харчаванне стала крыху лепшым. Таццяна Хоміч нагадала, што калі Марыя знаходзілася ў ПКТ, яна вельмі схуднела.

Стан здароўя Марыі Калеснікавай, як адзначае Таццяна Хоміч, пагоршыўся, але перад сустрэчай з бацькам у лістападзе 2024 года ёй пачалі аказваць медыцынскую дапамогу і палепшылі харчаванне, таму на той момант яна адчувала сябе лепш.

«Зараз мы атрымліваем толькі нейкія абрыўкі інфармацыі пра яе. Што яна ў атрадзе, што працуе. На жаль, у нас няма сувязі — ні ліставання, ні званкоў, ні перадач, ні сустрэч. Гэта была аднаразовая акцыя — сустрэча ў лістападзе», — расказала Таццяна Хоміч.

Сястра Марыі адзначыла, што цяпер наогул мала навінў пра палітвязняў, бо родныя вельмі баяцца дзяліцца інфармацыяй, што, на яе думку, звязана з вялікай колькасцю затрыманняў.

Што тычыцца сустрэчы Марыі Калеснікавай з бацькам у лістападзе 2024 года, то Таццяна Хоміч адзначыла, што большую частку сустрэчы, якая доўжылася каля паўтары гадзіны, Марыя распытвала бацьку пра навіны сям’і і блізкіх. Яна таксама цікавілася тым, што адбываецца ў Беларусі і свеце, і бацька, наколькі мог, ёй расказваў, але «сустрэча адбывалася не сам-насам». Выглядала яна крыху схуднелай, але «трымалася вельмі годна».

Паводле слоў Таццяны Хоміч, Марыя ведае пра магчымасць напісання прашэння аб памілаванні, але не хоча каментаваць інфармацыю, якая з’явілася ў СМІ.

«Я вельмі спадзяюся, што магчымасць выйсці на свабоду — нават калі праз прашэнне аб памілаванні — у Марыі з’явіцца, і яна ёю скарыстаецца. Але, канешне, рашэнне — за ёй», — сказала Таццяна Хоміч.

Па словах сястры палітзняволенай, раней дні нараджэння Марыі Калеснікавай падчас яе зняволення адзначалі ў коле блізкіх, але цяпер Таццяна знаходзіцца за мяжой і святкуе з сябрамі.

«Я ведаю, што і тата звычайна сустракаецца з кімсьці з знаёмых, з тымі, хто падтрымлівае. Раней гэта было больш масава. На жаль, шмат сяброў Марыі з’ехалі за гэты час. Я таксама адзначаю гэты дзень з блізкімі сябрамі, якія ведаюць Марыю. Для мяне гэта вельмі важны момант падтрымкі, бо гэты дзень для нашай сям’і заўсёды быў святам.

Мы заўсёды праводзілі яго разам — з сям’ёй ці сябрамі. Марыя вельмі любіць свой дзень нараджэння, бо гэта нагода сустрэцца. Нагадаю, што доўгі час яна жыла ў Германіі, і нават тады прыязджала на дзень нараджэння, каб быць разам з сям’ёй, блізкімі, калегамі. Гэта было заўсёды весела, шмат людзей, розных людзей — сапраўды важнае, добрае, вельмі светлае свята для нас», — узгадала Таццяна Хоміч.

• 3
• 1
• 1
• 1
• 0
• 14
• 0
• 1