Жанчына спрабавала патаемна правезці ў Беларусь пяць экзатычных яшчарак
Брэсцкія мытнікі спынілі спробу незаконна ўвезці з Польшчы ў Беларусь пяць экзатычных яшчарак. Рэптылій канфіскавалі і перадалі ў Мінскі заапарк, паведамляе Дзяржаўны мытны камітэт.
Незвычайны багаж належаў 44‑гадовай пасажырцы аўтобуса, якая ехала праз пункт пропуску «Брэст». Падчас праходжання мытнага кантролю жанчына выбрала зялёны калідор і заявіла, што тавараў для дэкларавання ў яе няма.
Мытнікі праверылі яе багаж з дапамогай рэнтгенаўскай устаноўкі. Атрыманыя здымкі паказалі, што неабходна правесці больш дэталёвы дагляд.
У выніку з пенапластавай скрынкі дасталі пяць пластыкавых кантэйнераў. У кожным з іх знаходзілася па адной яшчарцы — вейкавым бананаедзе (Correlophus ciliatus).
У дачыненні да грамадзянкі Расіі Брэсцкая мытня пачала адміністрацыйны працэс паводле часткі 2 артыкула 15.1 Кодэкса аб адміністрацыйных правапарушэннях Беларусі.
Каментары