Урад Ірака заявіў, што амерыканскія вайскоўцы цалкам пакінулі краіну. Па словах прадстаўніка іракскага ўрада, з Ірака вывелі ўсе баявыя падраздзяленні ЗША, а таксама сілы, якія займаліся лагістычнай падтрымкай. Аднак Злучаныя Штаты афіцыйна гэтую інфармацыю яшчэ не пацвердзілі, піша Deutsche Welle.
Пра вывад амерыканскіх войскаў ЗША і Ірак дамовіліся ў 2024 годзе. У апошнія гады ў краіне знаходзілася каля 2500 амерыканскіх вайскоўцаў. Апошнія амерыканскія падраздзяленні размяшчаліся ў Эрбілі ў курдскім рэгіёне, на вайсковай базе каля аэрапорта Багдада, а таксама ў так званай «зялёнай зоне» — урадавай частцы іракскай сталіцы.
З 2014 года ЗША разам з саюзнікамі праводзілі ў Іраку і Сірыі ваенную аперацыю супраць тэрарыстычнай арганізацыі «Ісламская дзяржава». У 2017 годзе было абвешчана пра ваенны разгром ІД у Іраку, а ў 2019‑м — у Сірыі. Пры гэтым асобныя ячэйкі арганізацыі захаваліся і працягваюць здзяйсняць напады, хоць больш не кантралююць значных тэрыторый у гэтых краінах.
Сітуацыя з бяспекай у Іраку апошнім часам пагоршылася на фоне вайны ў Іране. Падчас гэтага канфлікту атакам падвяргаліся амерыканскія аб'екты ў Іраку, а таксама пазіцыі курдскіх сіл.
Чакаецца, што вывад амерыканскіх войскаў будзе адзначацца ў Іраку як «Дзень незалежнасці». 28 верасня, калі заканчваецца ўстаноўлены тэрмін вываду, у краіне былі запланаваныя адразу чатыры святочныя мерапрыемствы. Дзяржаўныя ўстановы ў гэты дзень не працавалі.
Першапачаткова меркавалася, што звязаныя з Іранам узброеныя групоўкі ў Іраку па меры вываду амерыканскіх войскаў раззброяцца, а іх удзельнікі пасля ўвойдуць у склад дзяржаўных сілавых структур. Аднак прэм'ер-міністр Ірака Алі аз-Зейдзі абвясціў, што гэтую меру адклалі да чэрвеня 2027 года.
Амерыканскія войскі ўпершыню ўвайшлі ў Ірак у 2003 годзе разам з саюзнікамі. Мэтай аперацыі было звяржэнне тагачаснага кіраўніка краіны Садама Хусэйна. У 2011 годзе амерыканскія вайскоўцы вярнуліся ў Ірак ужо па просьбе ўрада краіны для ўдзелу ў барацьбе супраць «Ісламскай дзяржавы».
З 2015 года ў міжнароднай аперацыі ўдзельнічаў і нямецкі Бундэсвер, асноўнай задачай якога была падрыхтоўка іракскіх вайскоўцаў. Цяперашні мандат прадугледжвае магчымасць знаходжання ў Іраку да 500 нямецкіх вайскоўцаў і дзейнічае да студзеня 2027 года. Міністр замежных спраў Германіі Ёган Вадэфуль разлічвае, што нямецкія вайскоўцы змогуць захаваць прысутнасць у Эрбілі і пасля завяршэння міжнароднай аперацыі ў Іраку.
У Сірыі выбухнулі буйныя пратэсты пасля моцнага падаражання паліва
Саудаўская Аравія прыпыніла працу нафтаправода «Усход — Захад» пасля атакі дронаў з тэрыторыі Ірака. Па ім ідзе 5% сусветнай нафты
ЗША зноў ударылі па Іране. Тэгеран атакаваў амерыканскія базы ў Іраку і Іарданіі
ЗША і Саудаўская Аравія нанеслі ўдары па аб'ектах у Іраку, звязаных з Іранам
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2929
Каментары
• Поўнасцю — азначае «да канца, ва ўсім аб'ёме, без астатку». Часцей выкарыстоўваецца, калі гаворка ідзе пра колькасць, фізічны аб'ём, дзеянне або працэс, які завершаны на 100%.
• Прыклады: поўнасцю выплаціць крэдыт, поўнасцю прачытаць кнігу, поўнасцю запоўніць залу, поўнасцю аднавіць будынак.