Канцлер Германіі «павінен выставіць Пуціну ўльтыматум — спыненне агню або ракеты Taurus» — галоўны рэдактар Bild
Восенню 2024 года, калі ў нямецкім парламенце абмяркоўвалася пастаўка крылатых ракет Taurus, лідар ХДС Фрыдрых Мерц заяўляў, што канцлер павінен выставіць Уладзіміру Пуціну ультыматум: або Расія спыняе бамбардзіроўкі грамадзянскіх аб’ектаў, або Германія перадае Украіне ракеты Taurus.
Цяпер фатэль канцлера зойме сам Мерц, і яго будуць ацэньваць, у тым ліку, паводле таго, ці пачне ён дзейнічаць згодна са сваёй уласнай пазіцыяй. Галоўны рэдактар Bild Пауль Ронцхаймер піша: «Пасля жахлівых расійскіх удараў па дзіцячай пляцоўцы і бамбардзіроўцы цэнтра горада Сумы тэрмінова неабходная дакладная пазіцыя будучага ўрада [ФРГ] адносна далейшых паставак узбраенняў.
Надзея на тое, што прэзідэнт ЗША Дональд Трамп зможа хутка дасягнуць міру паміж Расіяй і Украінай, даўно разбілася.
Наадварот — Пуцін штодня даказвае, што ён не гатовы да перамоў. Бо ён хоча захапіць новыя тэрыторыі ва Украіне. Бо ён лічыць Украіну часткай Расіі. Бо ён не баіцца пагроз з боку Захаду.
Таму Мерц павінен разам з прэзідэнтам Францыі Макронам і прэм’ер-міністрам Польшчы Тускам даць зразумець: калі Пуцін у вызначаны тэрмін не прыме прапанову Трампа аб 30-дзённым спыненні агню, адбудзецца маштабнае нарошчванне ваеннай падтрымкі Украіны, у тым ліку з пастаўкамі ракет Taurus. Зяленскі ўжо некалькі тыдняў таму падпісаў прапанову аб перамір’і, а Пуцін дагэтуль ігнаруе Трампа.
Як апазіцыйны лідар Мерц праявіў сябе выдатным аналітыкам сітуацыі вакол Украіны. Як канцлер цяпер ён павінен весці за сабой. Калі яго абяруць федэральным канцлерам у маі, Мерц павінен ужо ў сваёй уступнай прамове ясна пазначыць, на што ён гатовы зараз.
Нельга дапусціць, каб Германія і далей не рэагавала на ваенныя злачынствы Пуціна», — рэзюмуе Ронцхамер.
Цяпер чытаюць
«Мікалая білі, дзе толькі яго бачылі». Пра катаванні зняволенага анархіста Дзядка расказала адвакатка Мацкевіч2
Каментары