Брытанія і Францыя прадставяць Трампу план размяшчэння ва Украіне 30 тысяч міратворцаў.
У бліжэйшыя дні ў Вашынгтоне прэм'ер-міністр Вялікабрытаніі Кір Стармер і прэзідэнт Францыі Эмануэль Макрон прадставяць Трампу план размяшчэння замежнага кантынгенту ва Украіне ў выпадку дасягнення пагаднення аб спыненні агню паміж Украінай і Расіяй.
Еўрапейская прапанова заключаецца ў тым, каб пераканаць Трампа пагадзіцца на абмежаваную ваенную ролю Злучаных Штатаў. Пра гэта паведамляе The Wall Street Journal са спасылкай на ўласныя крыніцы, піша «Суспільне».
Згодна з ініцыятывай, ЗША могуць не размяшчаць уласныя сілы ва Украіне, але ў выпадку пагрозы з боку РФ еўрапейскія войскі павінны задзейнічаць сістэмы супрацьпаветранай абароны і прывесці ў баявую гатоўнасць ВПС суседніх краін. У задачы брытанскіх і французскіх войскаў увойдзе абарона інфраструктуры, гарадоў і партоў у Чорным моры.
Паводле крыніц WSJ, без падтрымкі Трампа рэалізаваць еўрапейскі план адпраўкі міратворцаў будзе складана.
Еўрапейскія чыноўнікі заявілі, што Стармер плануе абмеркаваць гэты план з Трампам у чацвер. Адзначаецца, што ён наўрад ці звернецца з канкрэтнай просьбай аб амерыканскай дапамозе.
Макрон сустрэнецца з Трампам у панядзелак, 24 лютага. Ён павінен азнаёміць Трампа з больш шырокімі поглядамі саюзнікаў на вайну Расіі ва Украіне.
Прэм'ер-міністр Вялікабрытаніі Стармер 16 лютага 2025 года заявіў аб гатоўнасці размясціць брытанскіх вайскоўцаў ва Украіне для забеспячэння выканання любога мірнага пагаднення. Пра гэта ён напісаў у калонцы для The Telegraph. Гэта першы раз, калі ён прама заявіў, што разглядае такую магчымасць.
Паводле слоў прэм'ера, ён адчувае адказнасць, звязаную з магчымасцю паставіць пад пагрозу брытанскіх вайскоўцаў, але дапамога Украіне, паводле яго слоў, дапаможа ўмацаваць бяспеку самой Брытаніі і ўсяго еўрапейскага кантынента.
Аднак канцлер Нямеччыны Шольц назваў дыскусію пра гэта заўчаснай. Польшча заявіла, што не разглядае магчымасць адпраўкі вайскоўцаў ва Украіну для падтрымкі місіі. Міністр абароны ЗША Хегсет заявіў, што амерыканскія войскі не будуць размешчаныя ва Украіне ў рамках якіх-небудзь гарантый бяспекі.
На саміце ў Парыжы не ўдалося дамовіцца па пытанні міратворцаў ва Украіне.
Галоўнае пытанне, якое ўзнікае, калі дапусціць, што размяшчэнне замежных войскаў усё ж адбудзецца, колькі менавіта іх будзе. New York Times адзначае, што названыя Зяленскім 100 тысяч чалавек — нерэальная лічба, бо гэта больш, чым уся брытанская армія. Выданне цытуе неназванага еўрапейскага чыноўніка, які заявіў, што Еўропа не здолее на гэты момант сабраць нават 40 тысяч вайскоўцаў.
Каментары