ХАМАС адпусціў яшчэ двух ізраільцян. Сярод іх — бацька рудых хлопчыкаў, якія сталі сімвалам трагедыі 7 кастрычніка
У адказ Ізраіль павінен вызваліць 180 палесцінскіх зняволеных, піша Бі-бі-сі.
Гэта ўжо чацвёрты абмен з моманту, калі перамір’е ўступіла ў сілу 19 студзеня. Напярэдадні ХАМАС перадаў Ізраілю імёны трох закладнікаў, усе яны — мірныя жыхары.
Як паведаміў ЦАХАЛ, ужо вызвалены і перададзены Ізраілю:
54-гадовы Офір Кальдэрон — яго захапілі ў кібуцы Нір-Оз разам з двума дзецьмі (дзеці ўжо былі вызваленыя раней);
35-гадовы Ярдэн Бібас, якога захапілі разам з жонкай Шыры і двума дзецьмі — чатырохгадовым Арыэлем і дзесяцімесячным Кфірам (іх узрост на момант выкрадання).
Кфір Бібас стаў самым маленькім закладнікам ХАМАС. Па дарозе ў Газу сям’ю разлучылі, і Ярдэн Бібас утрымліваўся асобна цягам паўтара года.
Таксама чакаецца вызваленне 65-гадовага Кіта Сігела, які мае грамадзянства ЗША і Ізраіля. Ён быў захоплены разам з жонкай Авівай у кібуцы Кфар-Аза. Авіву вызвалілі яшчэ ў лістападзе 2023 года.
Паводле Reuters, у рамках гэтага абмену Ізраіль павінен вызваліць 182 палестынскіх зняволеных і затрыманых.
Рудавалосыя хлопчыкі Арыэль і Кфір Бібас сталі сімваламі барацьбы за вызваленне закладнікаў у Ізраілі і ва ўсім свеце. Іх фатаграфіі запоўнілі сацыяльныя сеткі і першыя палосы газет.
У 2023 годзе ХАМАС заявіў, што дзеці і іх маці забітыя, але ізраільская ваенная разведка не пацвердзіла гэтую інфармацыю.
18 студзеня 2024 года тысячы людзей у розных гарадах Ізраіля выйшлі з аранжавымі паветранымі шарамі, каб адзначыць першы дзень народзінаў Кфіра. Калі хлопчык яшчэ жывы, то два гады яму таксама споўнілася ў палоне.
У сераду ізраільскія СМІ паведамілі, што ўлады Ізраіля запатрабавалі ад ХАМАС раз’ясненняў наконт лёсу сям’і Бібас.
Калі Арыэль і Кфір яшчэ жывыя, то яны застаюцца апошнімі дзецьмі-закладнікамі ў Газе.
Яны павінны былі быць вызваленыя яшчэ ў лістападзе 2023 года ў рамках шасцідзённага перамір’я, або ў першай групе вызваленых пасля катарскага пагаднення ў студзені 2024 года.
Калі ж яны сапраўды загінулі, гэта можа стаць магутным аргументам для тых, хто патрабуе ад Ізраіля не спыняць аперацыю ў Газе да поўнага знішчэння ХАМАС.
Такія патрабаванні гучаць як сярод ізраільскага насельніцтва, так і ўрадавых колаў.
Дзед хлопчыкаў, Элі Бібас, напярэдадні вызвалення свайго сына Ярдэна сказаў:
«Я стараюся не загразнуць у плыні чутак, супярэчлівых навін і паўпраўды. Я проста чакаю».
Цяпер чытаюць
Памятаеце фота з мускулістым беларусам, які ў 2020-м ішоў у счэпцы з амапаўцам? Цяпер ён здымаецца ў кіно ў Англіі1
Каментары