55 гадзін на машыне і да 100 еўра за падсадку ў аўтобус. Пекла на ўездзе ў Беларусь з Польшчы
Чэргі на ўезд у Беларусь з Польшчы б'юць рэкорды. Людзі дзеляцца, колькі часу займае праходжанне мяжы.
Перадсвяточныя рэкорды
Карыстальніца тыктоку, якая працуе ў Еўропе дальнабойшчыцай і ноччу 20 снежня стала ў чаргу на легкавым аўто ў пункце пропуску «Тарэспаль — Брэст», у Беларусь трапіла толькі а 9-й раніцы 23 снежня.
На тое, каб дабрацца да шлагбаума на польскім баку, у яе сышло 47 гадзін, яшчэ 8 гадзін на сам праход дзвюх межаў. Вынік — 55 гадзін на тое, каб дабрацца з Польшчы ў Беларусь.
Адзін з карыстальнікаў чата пра перасячэнне мяжы, які стаў у «калейку» за 9,3 кіламетра да пункту пропуску, дабраўся да Брэста за 51 гадзіну і 30 хвілін.
На піку чарга з легкавікоў з Польшчы ў Беларусь расцягнулася амаль на 10 кіламетраў. Людзі, якія сталі ў чаргу 22 снежня ў 14:00, у Беларусь прыехалі ў 13:30 ужо 24 снежня. Амаль двое сутак.
Да 16 гадзін 24 снежня чарга скарацілася да 5 кіламетраў.
У тыктоку дзеляцца, што ў бліжэйшых крамах каля мяжы разабралі прадукты і раяць запасацца ежай і вадой загадзя.
Чарга з аўтобусаў пакуль не рассмакталася
Калі чарга легкавых аўто пачала змяншацца, то аўтобусная па-ранейшаму трымаецца на піку. На выезд з Польшчы ў Беларусь днём 24 снежня стаялі крыху больш за 100 аўтобусаў.
Карыстальнікі чата, якія без перасадак адстаялі ўсю чаргу з 100-105-й пазіцыі пішуць, што на праход мяжы ў іх сыходзіла ад 37 да 40 гадзін.
У пікавыя гадзіны падсесці можна было не бліжэй, чым у аўтобусы з другога ці нават трэцяга дзясятку ад шлагбаума.
На піку некаторыя кіроўцы аўтобусаў, якія былі бліжэй за ўсё да заезду на пункт пропуску, прасілі па 100 еўра з чалавека за магчымасць падсесці. Пазней цэны апусціліся да 50 еўра. Вольныя месцы бываюць пачынаючы з 15 аўтобуса, дзеляцца карыстальнікі.
Што ў зваротным кірунку?
На выезд з Беларусі ў ЕС чэргаў з аўтобусаў і легкавых аўто па стане 14 гадзін 24 снежня не было.
Карыстальнікі адмысловага чату пішуць, што праходжанне двух межаў на аўтобусе ў польскім напрамку заняло ўсяго дзве гадзіны.
Цяпер чытаюць
Хто той рэдактар беларускай Вікіпедыі, якога пасадзілі на два гады за «дыскрэдытацыю Беларусі»7
Каментары