Беларуска сцвярджае, што прадстаўнік Ціханоўскай у Кіеве Манько скраў яе сабаку. Што?
Беларуска Ірына Піянташка наракае, што яе любімага сабаку, кавалер-кінг-чарльз-спаніэля па мянушцы Шані, забраў сабе і адмаўляецца вяртаць Генадзь Манько, старшыня Місіі дэмакратычнай Беларусі ў Кіеве, дэлегат фракцыі «Воля» ў Каардынацыйнай радзе.
Ірына пераехала ў Польшчу ў 2021 годзе, атрымала там статус дадатковай аховы. У жніўні 2024-га была вымушаная рухацца далей і пераехаць у Партугалію па працы.
«Я хацела ўзяць сабаку з сабой, але знаёмыя ўпэўнілі мяне, што лепш будзе забраць сабаку, калі я ўладкуюся на месцы і змагу забяспечыць яму там умовы пражывання», — расказвае Ірына.
Па словах жанчыны, Генадзь Манько, з якім яны пазнаёміліся ў Варшаве ў Доме творцаў, дзе Ірына жыла нейкі час, прапанаваў ёй дагледзець сабаку, пакуль Ірына ўладкуецца ў новай краіне.
«Мяне запэўнілі, што Манько вельмі любіць сабак. Я аддала яму Шані з пашпартам і асабістымі рэчамі перад сваім ад’ездам. Але перад гэтым выразна заявіла, што гэта не назаўсёды. Ён сказаў мне, што я ў любы момант магу прыехаць і забраць сабаку», — дадае абставіны гісторыі жанчына.
У выніку, расказвае Ірына, калі яна праз два месяцы напісала, што гатовая забраць Шані, ёй адказалі, што гэта немагчыма: новыя гаспадары былі ўпэўненыя, што сабака быў перададзены ім назаўсёды.
Генадзь Манько сцвярджае, што, калі б ведаў, што за сабакам просяць паглядзець часова, яго сям'я б на гэта не пайшла:
«Яна (Ірына — НН) упрасіла мяне, незнаёмага ёй чалавека, маючы сына ў Варшаве і сяброў, забраць гэтага Шані, бо ёй не было куды яго падзець. Я ёй адразу сказаў, што працую ва Украіне, а жонка ў мяне жыве ў іншай краіне. І што я не займаюся развядзеннем і ўтрыманнем сабак, іх ператрымкай. І калі аддаеш, то аддаеш. Інакш — шукай іншы варыянт. Я папросту пайшоў чалавеку насустрач».
Непаразуменне паміж бакамі пацвярджаецца скрыншотамі ліставання, якія мае Рэдакцыя. На іх відаць, што калі Ірына ў першы раз піша жонцы спадара Манько пра тое, што абмяркоўвае з гаспадарамі ў Партугаліі хуткі прыезд сабакі, тая непрыемна здзіўляецца.
Відэа, у якім жонка Генадзя Манько прадстаўляе сабаку як іх новага гадаванца
Па выніку сям'я Манько патлумачыла: раз гэта была ператрымка, то яны выставяць за яе рахунак.
«Мне сказалі, што калі я хачу вярнуць сабаку, то мушу заплаціць за яе ўтрыманне — 25 еўра за суткі. Людзі так «палюбілі» Шані, што не могуць з ім расстацца, але гатовыя зрабіць гэта за 1200 еўра», — не хавае эмоцый Ірына і дадае, што купіла Шані за тысячу даляраў, але для яе ён каштоўны найперш тым, што сабака — гэта яе сям’я.
«Я хацела забраць сабаку, заплаціць за ўтрыманне адэкватную суму, а не тысячы еўра, і быць удзячнай гэтым людзям усё астатняе жыццё…»
Але па выніку Ірына ад бяссілля вырашыла апублічыць канфлікт, а таксама накіравала зварот у паліцыю з просьбай паспрыяць у вяртанні гадаванца.
Асноўная праблема ў тым, што дамоўленасць паміж Ірынай і Генадзем была вусная. І цяпер усё, што могуць зрабіць абодва бакі, гэта зноў перадамовіцца.
«Нашай Ніве» Генадзь Манько паабяцаў, што па сваім вяртанні з Украіны сам звяжацца з Ірынай і ўрэгулюе сітуацыю. Ён не разумее, чаму жанчына падняла публічную інфармацыйную хвалю з абвінавачваннямі, перш чым дамовіцца з імі да канца асабіста.
«Я не супраць вярнуць сабаку, але яна пачала з хлусні, што я скраў у яе сабаку, што я махляр… Пытанне не ў грошах, а ў тым, што такія хітрамудрыя вырашаюць свае пытанні як хочуць, пагражаючы нейкімі каламутнымі спосабамі. Калі б яна проста прыйшла, пазваніла мне: «Гена, я нешта пераблытала, аддала сабаку, бо думала, што будуць праблемы, а цяпер у мяне ёсць умовы яе ўтрымліваць»… Яна б яго забрала, мне нічога не трэба…»
У сваю чаргу Ірына кажа, што больш не хоча весці дыялог з тымі, хто забраў яе сабаку і прынёс ёй столькі эмацыйных перажыванняў, без адваката:
«Я звярнулася ў паліцыю, і вельмі спадзяюся, што хуткім часам усё вырашыцца».
У Брытаніі памерла самая старая котка ў свеце. Ёй было 33 гады
Не квадроберамі адзінымі. Нефармалы 2000-х расказалі, чаму было небяспечна станавіцца эма і як з'яданне корму з сабачай міскі дапамагае інтравертам
«Парваў-пагрыз усё цела». Кот праваабаронцы Сыса брутальна напаў на яго жонку, тая трапіла ў бальніцу
Цяпер чытаюць
Стала вядома, хто лётаў на Шры-Ланку разам з Анжалікай Мельнікавай і яе агентам13
Каментары
Цікаўнасьці, узровень культуры і г.д.