Вядомая грамадская актывістка можа ў хуткім часе паўстаць перад судом.
Увечары 19 кастрычніка на вуліцу Казлова ў Менску Ніна Багінская выйшла з плакатам з надпісам «БНФ», піша «Белсат».
Менавіта ў той дзень 36 гадоў таму быў створаны аргкамітэт Беларускага народнага фронту.
Спадарыня Багінская мела намер дайсці да будынку, на першым паверсе якога некалькі гадоў запар месцілася Управа партыі БНФ — самай масавай партыі канца 80-х і пачатку 2000-х гадоў. Актывістка хацела нагадаць грамадству, што менавіта з Беларускага народнага фронту пачаўся сучасны апазіцыйны рух у Беларусі. Некалькі гадоў запар у офісе партыі і на вуліцы каля яго штодня збіраліся людзі самых розных прафесій, каб абмеркаваць падзеі, падрыхтаваць правядзенне акцый ці папросту набыць газеты, часопісы або кнігі.
Сілавікі затрымалі Ніну Багінскую на рагу праспекта Незалежнасці і вуліцы Казлова. Жанчыну прывезлі ва Упраўленне ўнутраных спраў Савецкага раёна сталіцы.
Там міліцыянт адзеў ёй кайданкі, прычым рукі завярнуў за спіну, як небяспечнай злачынцы. Ніна Багінская мае праблемы з плячом і яна папрасіла, каб, калі ўжо міліцыянты бачаць такую неабходнасць, то хаця б далі магчымасць трымаць рукі спераду. Але тыя праігнаравалі ўзрост жанчыны і яе фізічны стан. Спадарыня Багінская адмовілася чытаць і падпісваць пратакол. Яе трымалі ў РУУС у кайданках амаль тры гадзіны і адпусцілі да суду толькі каля 10-й вечара.
Дата суду пакуль невядомая. Практыка апошніх трох гадоў сведчыць аб тым, што звычайна позвы міліцыянты не дасылаюць поштай, а затрымліваюць людзей дома ці на працы.
Хутчэй за ўсё Ніну Багінскую могуць пакараць чарговым штрафам. Жанчына ўдзельнічае ў акцыях апазіцыі з 1988 года з вялікім нацыянальным сцягам. Яна стала адным з сімвалаў мірных пратэстаў Беларусі. Яе штрафавалі столькі разоў, што сума штрафаў перавышае як мінімум 20 тысяч даляраў.
Цяпер чытаюць
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве16
Каментары
Ну хіба, што далей савеччына не выклікае ў беларусаў дрэнных асацыяцыі і трэба на руска-савецкі лад нешта пра "фашистов" дапісаць? Сімвалічна, што якраз чарговая гадавіна г.зв. Ночы расстраляных паэтаў - аднаго са шматлікіх САВЕЦКІХ КАМУНІСТЫЧНЫХ ЗЛАЧЫНСТВАЎ. А лукашэнкаўская Беларусь - гэта працяг той савецкай Беларусі.