Колькі часу засталося ў кандыдатаў у прэзідэнты, каб вылучыцца на выбары
Сёння стала вядома, што наступныя прэзідэнцкія выбары ў Беларусі пройдуць праз тры месяцы — 26 студзеня 2025 года.
Рэгістрацыя ініцыятыўнай групы ў ЦВК адбываецца не пазней чым за 85 дзён да выбараў.
То-бок у патэнцыйных кандыдатаў засталося 10 дзён для падачы дакументаў (апошняя дата — 1 лістапада).
Цэнтральная выбарчая камісія разглядае заяву ў пяцідзённы тэрмін з дня яе паступлення.
Збор подпісаў кандыдатаў у прэзідэнты пачынаецца за 80 дзён і заканчваецца за 50 дзён да выбараў. Да 7 снежня кандыдаты мусяць сабраць не менш за 100 тысяч подпісаў.
Рэгістрацыя кандыдатаў у прэзідэнты пачынаецца за 35 дзён і заканчваецца за 25 дзён да выбараў. Апошні дзень рэгістрацыі прыпадае на 1 студзеня 2025 года.
Зразумела, што апазіцыйных кандыдатаў на гэтых выбарах не будзе. У краіне працягваюцца масавыя рэпрэсіі супраць тых, хто выказаў пратэст Лукашэнку, а таксама адкрыта выступае супраць вайны. А самі выбарчыя кампаніі праводзяцца з парушэннямі і фальсіфікацыямі.
Нагадаем, што ў 2020-м дата выбараў была аб'яўлена 8 мая, а 15 мая быў апошнім днём, калі можна было падаць заяву ў ЦВК аб рэгістрацыі ініцыятыўнай групы па вылучэнні кандыдатаў.
Згодна з абноўленай у 2022 годзе Канстытуцыяй, прэзідэнтам можа быць абраны:
- грамадзянін Беларусі па нараджэнні, не маладзейшы за 40 гадоў, які валодае выбарчым правам і пастаянна пражывае ў Беларусі не менш за 20 гадоў непасрэдна перад выбарамі;
- не мае і не меў раней грамадзянства замежнай дзяржавы або дазволу на жыхарства ці іншага дакумента замежнай дзяржавы, які дае права на льготы і іншыя перавагі;
- кандыдатамі ў прэзідэнты не могуць быць грамадзяне, у адносінах да якіх ёсць уступіўшы ў законную сілу абвінаваўчы прысуд суда.
Выбары 2025 года стануць для Лукашэнкі сёмымі.
Апытанка
Цяпер чытаюць
ЗША паведамілі, што вызваленне палітвязняў у Беларусі «адкладзенае на некаторы час»22
Каментары