Чалы тлумачыць, чаму ў Беларусі растуць даходы і людзі пабеглі па крэдыты
Рэальныя заробкі ў Беларусі растуць, спажывецкія крэдыты таксама ставяць рэкорды. Чым гэта тлумачыцца?
У новым выпуску праграмы «Чалы: эканоміка» аналітык Сяргей Чалы звярнуў увагу на паскарэнне росту даходаў беларусаў.
У чэрвені 2024 года рэальная заработная плата павялічылася на 11,2% у параўнанні з аналагічным перыядам мінулага года, а ў ліпені — на 15,4%. Гэта самы высокі тэмп росту з кастрычніка мінулага года.
Па гэтым паказчыку Беларусь апярэджвае Расію. Паводле даных Еўразійскай эканамічнай камісіі, за студзень—чэрвень 2024 года сярэднемесячная намінальная зарплата ў Беларусі вырасла на 13%, у той час як у Расіі — на 9,4%. Такім чынам, тэмпы росту ў Беларусі ў 1,5 раза вышэйшыя, чым у Расіі, дзе сітуацыя на рынку працы яшчэ больш напружаная.
Сяргей Чалы адзначае, што часткова такі хуткі рост даходаў тлумачыцца складанай сітуацыяй на рынку працы, але гэта не адзіны фактар. Павышэнне даходаў насельніцтва таксама звязана з палітыкай ураду перад наступнымі прэзідэнцкімі выбарамі.
Расце ўзровень спажывецкага крэдытавання. Насельніцтва актыўна карыстаецца крэдытамі для пакрыцця спажывецкіх патрэб, у той час як жыллёвае крэдытаванне не паказвае такіх высокіх тэмпаў росту.
Па статыстыцы, абавязацельствы фізічных асобаў у параўнанні са станам на 1 жніўня мінулага года павялічыліся на 26,1%. Запазычанасць па спажывецкіх крэдытах дасягнула гістарычнага максімуму — за 12 месяцаў яна вырасла на 42,4%.
«Гэта сведчыць пра павышэнне ўпэўненасці ў заўтрашнім дні», — адзначае Чалы. Аднак на дынаміку ўплываюць таксама псіхалагічныя фактары: беларусы імкнуцца скарыстацца спрыяльнымі ўмовамі цяпер.
«Беларусы — рацыянальныя людзі, і яны разумеюць, што тое, што даюць сёння, хутчэй за ўсё, потым забяруць іншым спосабам», — заўважае эксперт.
Чалы лічыць, што ў будучыні даходы найхутчэй перастануць расці праз інфляцыю.
Цяпер чытаюць
Лукашэнка нервова пракаментаваў візіт Ціханоўскай у Кіеў27
Каментары