Германія выдала ордар на арышт падазраванага ў падрыве «Паўночнага патоку». Абвешчаны ў вышук Volodymyr Z
Нямецкая пракуратура выдала ордар на арышт украінца з-за падрыву «Паўночнага патоку» ў Балтыйскім моры, паведамляе нямецкі вяшчальнік ARD. Паводле версіі следства, ён нібыта апошнім часам знаходзіўся ў Польшчы.
Таксама падазраюць яшчэ двух грамадзян, аднак іх імёны не выдаюць. ARD піша, што яны, верагодна, удзельнічалі ў падрыве ў якасці дайвераў.
44-гадовага Уладзіміра Жураўлёва высачылі нямецкія следчыя пасля таго, як аўтамабіль, у якім ён ехаў, трапіў на камеру кантролю хуткасці недалёка ад порта, адкуль адплыло судна «Андрамеда» — як мяркуецца, з дыверсантамі, піша Expressen. Жураўлёў жыве з сям'ёй у прыгарадзе Варшавы, але з'яўляецца грамадзянінам Украіны. Прапісаны ён у Кіеве.
Два іншыя падазраваныя, мужчына і жанчына, таксама з'яўляюцца грамадзянамі Украіны і разам кіруюць дайвінг-кампаніяй ва Украіне, з якой звязаны Жураўлёў. Па даных следства, ва ўсіх ёсць неабходныя кваліфікацыя і рыштунак, а таксама ліцэнзіі на дайвінг са спецыяльным абсталяваннем.
У канцы чэрвеня Германія накіравала Польшчы запыт аб прававой дапамозе і еўрапейскі ордэр на арышт. Але польскія ўлады дагэтуль не адрэагавалі на гэты запыт, і, як паведамляецца, Жураўлёў схаваўся.
У сакавіку 2023 года прэзідэнт Украіны Уладзімір Зяленскі на пытанне «Суспільнага» заявіў, што Украіна не датычная да падрыву газаправодаў. Паводле яго слоў, такую інфармацыю могуць распаўсюджваць, каб запаволіць дапамогу Украіне.
У лістападзе 2023 года газета The Washington Post апублікавала артыкул, у якім пісала, што каардынаваў падрыў газаправода нібыта ўкраінскі афіцэр Чарвінскі, якога ва Украіне абвінавачваюць у дачыненні да абстрэлу аэрадрома «Канатава» і перавышэнні службовых паўнамоцтваў.
Сваю датычнасць ён адмаўляе. Выбух на «Паўночным патоку» адбыўся 26 верасня 2022 года. Данія і Швецыя ўжо завяршылі расследаванне без крымінальнай справы.
Каментары