Расійскі бізнэс чакае наступлення «лагістычнага калапсу» праз тое, што банк Chouzhou Commercial Bank напярэдадні кітайскага Новага года паведаміў кліентам аб прыпыненні аперацый з Расіяй і Беларуссю. Пра гэта расказала газета «Ведомости» са спасылкай на знаёмых з сітуацыяй прадстаўнікоў бізнэсу.
Паводле інфармацыі выдання, менеджмент банка яшчэ на мінулым тыдні паведаміў сваім кліентам пра спыненне адносін з беларускімі і расійскімі арганізацыямі. Пры гэтым першапачаткова ў Chouzhou паведамлялі аб спыненні плацяжоў толькі па пераліку тавараў, увоз якіх у Расію забаронены міжнароднымі санкцыямі.
У «Ведомостях» адзначылі, што банк Chouzhou стаў галоўным разліковым цэнтрам для расійскіх імпарцёраў, чаму спрыяла сярод іншага размяшчэнне яго штаб-кватэры ў адным з галоўных лагістычных вузлоў кітайскага экспарту ў Расію — горадзе Іу.
Крыніцы газеты сцвярджаюць, што спыненне разлікаў закранае транзакцыі, якія праводзяцца не толькі праз SWIFT, але і з дапамогай альтэрнатыўных сістэм перадачы фінансавых паведамленняў — расійскай СПФС і кітайскай CIPS.
Прадстаўнікі расійскага бізнэсу заявілі газеце, што ў сувязі з сітуацыяй, якая склалася, а таксама з надыходам кітайскага Новага года чакаюць лагістычны калапс, бо з-за доўгіх выхадных у Кітаі вываз тавару будзе вельмі абцяжараны аж да сакавіка.
Каментары