У закладніках у ХАМАС застаецца яшчэ 201 чалавек, лёс гэтых людзей невядомы.
ХАМАС вызваліў Джудзіт Раанан і яе 17-гадовую дачку Наталі — амерыканак, захопленых 7 кастрычніка пры нападзе на кібуц Нахаль-Оз, піша Бі-бі-сі.
Джудзіт і Наталі прыляцелі ў Ізраіль са Злучаных Штатаў, каб адсвяткаваць 85-годдзе Тамар Раанан, маці Джудзіт, а таксама заканчэнне Наталі сярэдняй школы.
Маці з дачкой планавалі паляцець дадому ў ЗША раней, але памянялі рэйс, каб застацца ў Ізраілі даўжэй.
Пасярэднікамі ў іх вызваленні выступілі Катар і Міжнародны камітэт Чырвонага Крыжа.
Тамар Раанан і яе партнёр Ехіэль выжылі, схаваўшыся ў сваім бяспечным пакоі дома ў Нахаль-Оз, дзе былі выратаваныя салдатамі ЦАХАЛ.
Яшчэ восем іх сямейнікаў у кібуцы Беэры лічацца зніклымі, забітыя двое сямейнікаў і сацыяльны работнік, які даглядаў аднаго з іх. Пяцёра, як мяркуецца, знаходзяцца ў закладніках.
Пасля двух цяжкіх тыдняў, поўных жаху і нявызначанасці, вызваленне Джудзіт і Наталі Раанан стала момантам палёгкі і радасці.
На фатаграфіі, апублікаванай пасля таго, як жанчыны аказаліся ў бяспечным месцы, яны выглядаюць вельмі змучанымі.
Як іх удалося вызваліць? Улады Катара заявілі, што гэта адбылося пасля «многіх дзён бесперапыннай камунікацыі».
Міністэрства замежных спраў заявіла, што спадзяецца, што дыялог прывядзе да вызвалення і іншых закладнікаў.
Джо Байдэн, які не хаваў радасці, падзякаваў Катару і Ізраілю за «іх партнёрства ў гэтай працы».
Марк Рэгеў, старшы дарадца прэм'ер-міністра Ізраіля Біньяміна Нетаньяху, прызнаў, што дыпламатыя адыграла сваю ролю, але дадаў, што да вызвалення закладнікаў таксама прывяла ваенная моц Ізраіля.
Зараз ёсць надзея, што неўзабаве будуць вызваленыя і іншыя закладнікі, асабліва пажылыя людзі і дзеці.
У закладніках у ХАМАС застаецца яшчэ 201 чалавек, лёс гэтых людзей невядомы.
Каментары
И как сосуществовать с таким "соседом"...