Старую вуліцу можна ўбачыць каля «шагалаўскай» сінагогі. У Віцебску з'явіўся новы стрыт-арт ФОТАФАКТ
Чорна-белы малюнак з'явіўся на сцяне будынка каля нядаўна адноўленай Вялікай Любавіцкай сінагогі ў Віцебску. Ёсць версія, што менавіта гэтую сінагогу наведвала сям'я Марка Шагала, бо яна была найбліжэйшай ад дома бацькоў мастака.
Цяпер у доме месціцца Музей Марка Шагала. Гадоў 15 таму гучалі прапановы, каб зрабіць цэлы «шагалаўскі квартал», узнавіўшы гістарычную забудову. Але ўвасабленню амбітнай ідэі перашкодзіла адсутнасць сродкаў. Цяпер віцебскую вуліцу так, як яна выглядала ў канцы XIX — пачатку XX стагоддзя, можна ўбачыць на малюнку Юрыя Дубоўскага.
Паводле мастака, прапанова размаляваць глухую сцяну суседняга будынка паступіла яму падчас адкрыцця сінагогі. Над малюнкам ён працаваў 6 дзён.
Фота: vitebsk.biz
Гэта не першы аб'ект стрыт-арту, які Юрый Дубоўскі (вядомы пад псеўданімам Белы слон) стварыў у Віцебску. Самыя вядомыя з іх — «Бетховен» на будынку віцебскай філармоніі, «Bubble-fish» на сцяне падстанцыі на вуліцы Суворава, таксама мастак распісаў цытатамі з вершаў і лістоў Марка Шагала жылыя дамы на вуліцы, якая носіць імя мастака.
«Месячны плацеж пацягне на 340 рублёў». Што будзе ў Беларусі з мабільным інтэрнэтам?15
Каментары