Маладая беларуска трымае ў страху Мальту — пагражала медыкам і паліцэйскім, а калі яе адпусцілі, то пакусала партнёра
Імя 28‑гадовай грамадзянкі Беларусі Арыны Зракавай усё часцей трапляе ў крымінальную зводку вострава. Цяпер яна пад вартай.
Першы залёт Арыны (Aryna Zrakava) здарыўся ў студзені 2026 года. Яна так напілася ў мястэчку Гаргур (Għargħur), што, гаворачы юрыдычнай мовай, не магла паклапаціцца пра сябе сама. Але калі прыехалі медыкі і паліцэйскія, каб дапамагчы ёй, то беларуска абражала іх і пагражала.
Спачатку Зракава адмаўляла віну, але потым усё ж прызнала ўсе абвінавачанні. Суд прызнаў яе вінаватай у абразах і пагрозах, парушэнні грамадскага парадку і публічным п'янстве.
Улічыўшы, што ў дзяўчыны ёсць праблемы з алкаголем і наркотыкамі, суд замест турмы прызначыў ёй тры гады выпрабавальнага тэрміну, штраф 1200 еўра, прымусовае лячэнне ад залежнасцяў на тры гады і ахоўны ордар на карысць пяці пацярпелых — таксама на тры гады.
Аднак на гэтым Арына не супакоілася. Як паведамляе тэлеканал TVM, раніцай 19 ліпеня Зракава з'явілася ў гаражы ў горадзе Курмі (Qormi), дзе працуе яе былы партнёр. Яна ўдарыла мужчыну шлемам і ўкусіла яго за палец. Акрамя таго, ёй інкрымінуюць пашкоджанне матацыклаў і лабавага шкла аўтамабіляў у гаражы — шкода ацэньваецца больш чым у 2000 еўра.
20 ліпеня ў судзе Зракава не прызнала сябе вінаватай. Абарона прасіла вызваліць яе пад заклад, але пракуратура запярэчыла — у тым ліку таму, што пацярпелы яшчэ не даў паказанняў. Суд адмовіў у закладзе і пакінуў беларуску пад вартай, а на карысць былога партнёра выдаў ахоўны ордар тэрмінам на тры гады.
Калі віну Арыны ў другім нападзе дакажуць, то ёй будзе пагражаць пакаранне і па студзеньскай справе.
Каментары