У Баранавічах пачаўся суд над былым дырэктарам птушкафабрыкі «Дружба». Працэс закрыты
Судовае пасяджэнне па справе былога гендырэктара і экс-сенатара Васіля Маркевіча пачалося раніцай 29 сакавіка. Яго судзяць па дзвюх частках арт. 430 Крымінальнага кодэкса (атрыманне хабару), паведамляе Intex-press.by.
Судовае пасяджэнне праходзіць у закрытым рэжыме.
Першая інфармацыя аб затрыманні на той момант гендырэктара ААТ «Птушкафабрыка «Дружба» Васіля Маркевіча з'явілася ў ліпені 2022 года. Работнікі прадпрыемства распавядалі, што кіраўніка вывелі ў кайданках проста з кабінета, «нібы за хабар».
Прыкладна праз месяц на дзяржТБ выйшаў сюжэт аб карупцыі ў сельскай гаспадарцы, у якім паведамлялася, што адзін з кіраўнікоў птушкафабрыкі (прозвішча пры гэтым не называлася) «за лабіраванне інтарэсаў прыватнай кампаніі пры заключэнні дагавораў атрымаў хабар у памеры 6 500 даляраў ЗША».
У канцы кастрычніка мінулага года Савет Рэспублікі Нацыянальнага сходу датэрмінова пазбавіў Васіля Маркевіча статусу сенатара. А ў канцы лістапада на «Дружбу» прызначылі новага кіраўніка.
Васіль Маркевіч узначальваў птушкафабрыку «Дружба» з 2003 года. Ён узнагароджаны медалём «За працоўныя заслугі», у 2012 годзе быў удастоены звання «Ганаровы грамадзянін Баранавіцкага раёна», а ў 2013-м — звання «Заслужаны работнік сельскай гаспадаркі Рэспублікі Беларусь».
У 2016 годзе Васіль Маркевіч быў удастоены звання «Чалавек года» Брэсцкай вобласці, а ў 2018-м прызнаны найлепшым кіраўніком сярод прадпрыемстваў у галіне сельскай гаспадаркі, перапрацоўкі сельскагаспадарчай прадукцыі, абслугоўвання сельскай гаспадаркі на Брэстчыне. Абіраўся членам Савета Рэспублікі шостага і сёмага скліканняў.
Цяпер чытаюць
Вялікая гутарка з Франакам Вячоркам — пра круглы стол з Лукашэнкам, памылкі, хэйтараў і галоўнае дасягненне38
Каментары