Снапкоў расказаў, з якім настроем едзе працаваць паслом у Кітай, дзе лютуе каранавірус
Колькасць памерлых ад каранавіруса ў Кітаі пераваліла за тысячу чалавек, захварэлых ужо 43 тысячы (выздаравела ўжо 4 тысяч).
З якім маральным настроем у такой сітуацыі ў Кітай збіраецца наш новы пасол Мікалай Снапкоў? Пра гэта «Наша Ніва» пацікавілася ў яго асабіста.
«Не пагаджуся, што каранавірус лютуе — ён ідзе на спад. Ну так, тысяча чалавек загінула, але колькі ў тым жа Кітаі людзей штогод незаўважна памірае ад простага грыпу? Мы не ведаем пра гэта. Сітуацыя з гэтым вірусам на кантролі ў кіраўніка краіны. Таму, у адпаведнасці з указам, спакойна еду выконваць сваю задачу. Нічога не адкладаю — збіраюся і еду», — сказаў Снапкоў.
У чым ён бачыць сваю галоўную задачу ў Кітаі?
«Прэзідэнт пры прызначэнні вельмі проста пра гэта сказаў. Проста і глыбока, як заўсёды: палітычныя і сяброўскія адносіны, якія будуюць лідары краін, павінны быць на магутным эканамічным падмурку. Выканаць даручэнне, умацаваць гэты падмурак і базу росту эканомікі нашай краіны — вось мая задача», — дадаў новы пасол.
Каментары