У мінскіх дварах з'явяцца кантэйнеры для збору тэкстыльных адкідаў
У кастрычніку кампанія «Рэмондзіс Мінск» пачне пілотны праект па ўстаноўцы ў мінскіх дварах спецыяльных кантэйнераў для збору тэкстыльных вырабаў. Праект рэалізуюць сумесна з Мінскай гарадской жыллёвай гаспадаркай, паведамляе агенцтва «Мінск-Навіны».
Падобны збор тэкстылю ўжо праводзіўся ў Беларусі ў 2011—2015 гадах, але тады рэчы складвалі ў кантэйнеры разам з іншымі відамі другаснай сыравіны. У выніку тэкстыль убіраў вільгаць, забруджваўся і губляў магчымасць далейшай яго перапрацоўкі.
Цяпер для яго будуць выкарыстоўваць закрытыя кантэйнеры, якія паставяць асобна ад пляцовак для збору звычайных адкідаў. Забіраць іх змесціва будуць спецыяльныя машыны, а не звычайныя смеццявозы.
У кантэйнеры можна будзе здаваць чыстыя і сухія рэчы, абавязкова запакаваныя ў шчыльна завязаныя пластыкавыя пакеты. Гэта тычыцца не толькі адзення, але і пасцельнай бялізны, коўдраў, ручнікоў ды іншых тэкстыльных рэчаў. Абутак таксама можна будзе здаваць, але яго трэба класці ў асобны пакет.
Пасля збору тэкстыль будуць сартаваць уручную паводле віду і складу тканіны. Рэчы, якія захаваліся ў добрым стане, змогуць перадаваць на продаж у фармаце сэканд-хэнду або дабрачынным арганізацыям.
Тэкстыль, непрыдатны для паўторнага выкарыстання, будуць перапрацоўваць у рыззё, якое могуць выкарыстоўваць розныя прадпрыемствы ў тэхнічных мэтах. Частку сыравіны плануюць перапрацоўваць глыбей для вытворчасці RDF-паліва.
У кампаніі адзначаюць, што ў ідэале на палігоны не павінна трапляць ніякая частка тэкстыльных адкідаў.
Першую партыю з 20‑ці кантэйнераў плануюць паставіць у кастрычніку ў Маскоўскім і Фрунзенскім раёнах Мінска. Да канца года іх колькасць павінна вырасці да 50-ці.
«Рэмондзіс Мінск» плануе самастойна арганізаваць увесь цыкл абыходжання з тэкстылем — ад збору і сартавання да перапрацоўкі. У кампаніі маюць намер сачыць за вынікамі праекта і ўлічваць водгукі жыхароў. У перспектыве кантэйнерамі плануюць ахапіць усе раёны Мінска, а пасля пашырыць праект на абласныя цэнтры і іншыя гарады Беларусі.
Цяпер чытаюць
Арыштаваны міністр прыродных рэсурсаў выбраў «стратэгію Брыло»11
Каментары