Абедзве дэталі былі пакрытыя радыёлакацыйна-паглынальным матэрыялам, які выкарыстоўваецца для павышэння малапрыкметнасці самалёта.
Урад Кітая атрымаў сакрэтныя дэталі амерыканскага знішчальніка-невідзімкі F-35, якія падчас адпраўкі з Аўстраліі ў ЗША з незразумелых прычын апынуліся ў Ганконгу. Пра гэта Bloomberg паведамілі крыніцы, знаёмыя з інцыдэнтам.
Паводле звестак агенцтва, у канцы мая кампанія UPS перавозіла ліхтар кабіны і дзверы зброевага адсека ад F-35. Абедзве дэталі вытворчасці Lockheed Martin былі пакрытыя радыёлакацыйна-паглынальным матэрыялам, які выкарыстоўваецца для павышэння малапрыкметнасці самалёта.
Па дарозе ў ЗША самалёт, які перавозіў дэталі, сеў у Паўднёвай Карэі, пасля чаго яго накіравалі ў Ганконг. Чаму адбылася гэтая пасадка і перанакіраванне, невядома. Таксама незразумела, ці было гэта зроблена наўмысна, ці адбылося памылкова. Аднак пасля гэтага, як распавялі дзве крыніцы, кітайскія ўлады атрымалі дэталі і пакуль іх не вярнулі.
Зараз як мінімум два камітэты Кангрэса ЗША расследуюць тое, што адбылося.
Пентагон заявіў, што займаецца вяртаннем дэталяў. Прадстаўнік Lockheed Martin у Аўстраліі паведаміў, што дэталі былі няспраўнымі і «лічацца маларызыкоўнымі з пункту гледжання іх эксплуатацыйнага выкарыстання». Міністр абароны Аўстраліі Рычард Марлз распавёў, што Канбера вывучае ўсе абставіны інцыдэнту.
ЗША і іх саюзнікі разглядаюць магчымасць доступу Кітая да тэхналогій F-35 як адчувальнае пытанне.
Сенатар-дэмакрат ад Мічыгана Эліса Слоткін заявіла Bloomberg, што Кітай пастаянна спрабуе атрымаць інфармацыю пра амерыканскую вайсковую тэхніку. Былы аналітык Даследчай службы Кангрэса Джэй Джэй Гертлер адзначыў, што ЗША не павінны даваць патэнцыйным праціўнікам магчымасць вывучаць сваё ўзбраенне, піша Moscow Times.
F-35 — адзін з асноўных сучасных амерыканскіх знішчальнікаў. Самалёты гэтага тыпу закупілі каля 20 краін, у тым ліку Аўстралія, Паўднёвая Карэя, Японія і Сінгапур.
Цяпер чытаюць
Ён адкрыта называў расійскіх вайскоўцаў акупантамі, а расійскую ўладу — фашысцкай. За краты кінулі супрацоўніка МТБанка2
Каментары