Высілкамі аўтараў інтэрнэт-праекту «Praunik.org» накладам 299 асобнікаў выдадзены часопіс «Праўнік». Геніяльны!
Галоўны рэдактар «Праўніка» Ўладзіслаў Белавусаў характарызуе выданьне як праект для маладых і здаровых розумам юрыстаў і палітолягаў. Мэта часопісу — глядзець на права беларускімі вачыма. Выдаўцы ставяць наступныя задачы: кампэнсаваць брак якаснай юрыдычнай інфармацыі на беларускай мове, распрацаваць уласнабеларускую юрыдычную тэрміналёгію ды аб’яднаць беларускамоўных студэнтаў-правазнаўцаў. Колькі месяцаў таму сайт praunik.org cтварылі студэнты й асьпіранты прававых спэцыяльнасьцяў Беларускага дзяржаўнага ўнівэрсытэту ды Менскага дзяржаўнага лінгвістычага ўнівэрсытэту.
Першы нумар часопісу зьмяшчае матэрыялы пра ўсе галіны права — ад канстытуцыйнага да крымінальнага. Вялікая ўвага надаецца Эўрапэйскаму праву, зважаючы на сучасныя працэсы эўрапейскай інтэграцыі і тое, што Беларусь мае багатую гістарычную спадчыну ў галіне права: юрыдычныя дакумэнты часоў ВКЛ ды Статуты.
Каб пазьбегнуць правінцыялізацыі выданьня, рэдкалегія плянуе наладзіць супрацоўніцтва зь вядучымі спэцыялістамі ў галіне права з эўрапейскіх унівэрсытэтаў.
Ідэя стварэньня беларускамоўнага юрыдычнага выданьня ўзьнікла яшчэ паўтара году таму, і за гэты час пройдзены шлях ад стварэньня сайту да выданьня першага нумару часопісу. Часопіс надрукаваны накладам 299 асобнікаў у Смаленску пры ўдзеле Цэнтру падтрымкі выдавецкіх ініцыятыў. Тое, што прэзэнтацыя «Праўніка» адбывалася ня ў сьценах БДУ і не ў прысутнасьці запрошаных афіцыйных асоб, выразна характарызуе стаўленьне апошніх да ініцыятывы студэнтаў права. Паводле слоў рэдкалегіі, іх родная альма-матэр не дапамагала, але й не перашкаджала. З боку кіраўніцтва юрыдычнага факультэту няма пакуль ніякай рэакцыі на стварэньне беларускамоўнага юрыдычнага выданьня. Тым ня менш, выдаўцы плянуюць даслаць часопіс у бібліятэкі ўсіх ВНУ, што маюць юрыдычныя факультэты, а таксама ў замежныя ўнівэрсытэты, дзе навучаюцца беларускія юрысты.
Часопіс выдаецца па-беларуску і ангельску. Беларуская мова жыве ажно ў трох варыянтах: клясычны правапіс, «наркамаўка» і лацінка. З аўтараў «НН» у «Праўніку» выступаюць Пётра Рудкоўскі і Сяргей Богдан.
Рэдакцыйная калегія чакае прапаноў з боку аўтараў, і ня толькі студэнтаў ды асьпірантаў. Патрабаваньні да тэкстаў — актуальнасьць, якасьць і патэнцыял з гледзішча цікавасьці для чытачоў. Тэксты можна дасылаць на электронны адрас часопісу praunik @praunik.org.
Перакладчык Лявон Баршчэўскі на прэзэнтацыі зазначыў, што «пасьля ўбачанага і пачутага адчувае, што недарма пражыў жыцьцё». Таксама ён заявіў аб сваёй гатоўнасьці ўсяляк дапамагчы стваральнікам часопісу ў якасьці лінгвіста і выказаў упэўненасьць у тым, што «маладыя людзі дажывуць да таго моманту, калі плён іх дзейнасьці спатрэбіцца і будзе выкарыстоўвацца па прызначэньні».
Падстава для такога энтузіязму — сур’ёзны маштаб выданьня, зададзены першым нумарам, а таксама бездакорная культура мовы. Гэтым «Праўнік» радыкальна розьніцца ад самапальных галіновых публікатак 1990-х. Затое няма ў выданьні лішняй мэтафізыкі, якой раней так грашыў беларускі інтэлектуалізм. Выданьне «ARCHE», «Палітычнай сферы», «Праўніка» адлюстроўвае важную тэндэнцыю прафэсіяналізацыі беларускамоўнае пэрыёдыкі і яе набліжэньня да заходніх стандартаў.
Цяпер чытаюць
Коўл Лукашэнку: Табе трэба быць больш асцярожным, за сталом кепскіх пацаноў застаўся адзін ты17
Каментары