Biełaruskaja kampanija vypuściła dryp-kavu z vodarami našych haradoŭ
Biełaruskaja kampanija Daloni Coffee vypuściła tematyčny nabor dryp-kavy «Smak Radzimy», pryśviečany haradam Biełarusi. U kalekcyju ŭvajšli 12 smakaŭ, častka ź jakich pradstaŭlena monahatunkami, a dla abłasnych centraŭ i Minska raspracavali aŭtarskija kavavyja sumiesi, piša Hrodna Life.
U nabor uklučyli smaki, pryśviečanyja Minsku, Brestu, Hrodnu, Viciebsku, Mahilovu, Homielu, Babrujsku, Lidzie, Pinsku, Łunincu, Połacku, Rahačovu i Hłybokamu.
Pra nabor kampanija raskazała ŭ Threads.
U kamientarach jaje pradstaŭniki adznačyli, što nie zmahli ŭklučyć usie harady adrazu. Ale kali budzie cikavaść pakupnikoŭ da inšych miaścin, to tam płanujuć i druhuju častku kalekcyi ź inšymi nasielenymi punktami. Kamientatary prasili, naprykład, Narač i Baranavičy.
Asobna ŭ kamientarach kampanija raskazała pra raspracoŭku drypa dla Lidy. Dla jaho stvaryli śpiecyjalnuju fiermientacyju z vykarystańniem niamieckaha chmielu i ciomnaha piva. A voś jakija na smak inšyja harady, možna daviedacca, pakaštavaŭšy «Smak Radzimy».
«Haradski» nabor kaštuje 57 rubloŭ i ŭklučaje ŭ siabie 12 dryp-pakietaŭ.
Taksama Daloni Coffee vypuściła turystyčny set razam z prajektam Vander Group. U jaho ŭvajšli dryp-pakiety i «pašpart vandroŭnika» dla pajezdak pa Biełarusi. Košt naboru skłaŭ 99 rubloŭ.
Dryp-pakiet — heta kampaktny papiarovy filtr z porcyjaj mielenaj kavy. Dla pryhatavańnia napoju nie patrabujecca kavavarka ci turka — dastatkova zalić kavu haračaj vadoj. U kožnym pakiecie znachodzicca kala 12 hramaŭ kavy. Vytvorcy vykarystoŭvajuć azotnuju ŭpakoŭku, dziakujučy jakoj pradukt daŭžej zachoŭvaje śviežaść i vodar. Termin prydatnaści naboru składaje šeść miesiacaŭ.
Technałohija dryp-kavy źjaviłasia ŭ Japonii ŭ 1990‑ch hadach. Paźniej kanstrukcyju ŭdaskanalili: filtr stali zamacoŭvać nad kubkam, kab vada prachodziła praz płast mielenaj kavy.
Kampanija Daloni Coffee pačała pracu ŭ 2015 hodzie. Jaje zasnavaŭ Dźmitryj Kiślakoŭ, jaki da taho momantu ŭžo bolš za 13 hadoŭ zajmaŭsia vytvorčaściu kavy. Pieršapačatkova brend nazyvaŭsia Coffee Everyday i vypuskaŭ piać kavavych blendaŭ, nazvanych pa dniach tydnia — ad paniadziełka da piatnicy. Paźniej kampanija pašyryła asartymient i zasiarodziłasia na specialty coffee i monahatunkach arabiki.
U 2023 hodzie kampanija praviała rebrendynh i aficyjna stała nazyvacca Daloni Coffee. Nazva źviazana sa słovam «dałoni».
«My vybrali słova «Dałoni» dla našaha brenda, tamu što ličym, što dałoni ludziej — heta najvažniejšy elemient kavavaha šlachu ad jahady da kubka», — napisana na sajcie kampanii.
Ciapier čytajuć
Viadučy STB Raman Pratasievič pabraŭsia šlubam trecim razam5
Kamientary