«Z zaradkami ŭsio z samaha pačatku pajšło nie tak». Biełarus raskazaŭ, jak jeździŭ na elektrakary ź Minska ŭ Taškient
Padarožničać na elektrakary pa Biełarusi i Jeŭropie možna biez prablem (prynamsi, tak kažuć mnohija). A što, kali vypravicca ŭ inšy bok — pa SND? Čytač vydańnia «Anłajnier» pa imieni Alaksandr razam sa svaim «šturmanam» Jaŭhienam na novaj Nissan Ariya vypraviŭsia va Uźbiekistan. Padarožnik padzialiŭsia, da čaho treba rychtavacca i jakuju sumu varta adkłaści na pajezdku.
Padrychtoŭka i maršrut. Što pahladzieć pa darozie ź Minska ŭ Taškient?
Dadziena: Nissan Ariya 2022 hoda, ale nabytaja novaj u 2024-m, z batarejaj na 87 kVt⋅h i realnym zapasam chodu, pa słovach hieroja materyjału, u ciopły čas hoda — kala 500 km. Na takim aŭtamabili Alaksandr vyrašyŭ skarać darohi SND. Jak pačatkoviec-padarožnik navažyŭsia na pieršuju dalokuju pajezdku na elektrakary?
— Ja ŭ pryncypie lublu jeździć na mašynie, tamu vyrašyŭ zładzić sabie svojeasablivy čelendž — dabracca da Taškienta na «elektryčcy», — kaža kiroŭca. — Pierad pajezdkaj ja, zrazumieła, pabudavaŭ maršrut (u hetym dapamoh sajt 2chargers.ru, jaki pakryvaje Biełaruś, Rasiju i Kazachstan), pravieryŭ, ci jość zaradki, i pierakanaŭsia, što ŭ teoryi ŭsio realna.
Darečy, raniej na aŭtamabili ja dalej Smalenska nie vybiraŭsia.
Mašynu da pajezdki śpiecyjalna nie rychtavaŭ, tolki krychu raniej za rehłamient prajšoŭ druhoje TA. Kupiŭ damkrat, uziaŭ naprakat zapasnoje koła, tamu što jaho ŭ kamplekcie z aŭto nie było. Darečy, ničoha ź pieraličanaha nie spatrebiłasia. Ale kali b čahości nie było — jano dakładna spatrebiłasia b.
Jašče naprakat uziaŭ zaradku, jakaja na 32 ampiery macniejšaja za maju i ź pierachadnikami na pramysłovyja razietki. Jana patrebnaja była na vypadak, kali dzieści nie akažacca EZS i daviadziecca prasić elektryčnaść u jakoj-niebudź kaviarni.
Čamu Uźbiekistan? U Taškiencie ja ŭžo byŭ niekalki razoŭ. U našaj kampanii tam znachodzicca ofis — ja płanavaŭ i papracavać, i adpačyć. Horad mnie vielmi spadabaŭsia. Ciapier tam ciopła, ale jašče nie horača.
Piać dzion zaniała daroha ŭ adzin bok (vyjazdžali 17 krasavika), piać dzion my tam prabyli, i piać dzion doŭžyŭsia naš maršrut nazad. Pakul mašyna zaradžałasia na stancyjach — pieššu ahladali horad.
Naš maršrut byŭ takim: Minsk — Smalensk — Razań (u abjezd Maskvy) — Samara — Arenburh. Dalej my zajechali na terytoryju Kazachstana: Aktobie — Karabuta — Kyzyłarda — Turkiestan— Šymkient. I krajni punkt — uźbiekistanski Taškient, kudy my i nakiroŭvalisia. U Rasii bolš za ŭsio spadabalisia Samara i Arenburh, a ŭ Kazachstanie — Turkiestan.
Turkiestan apošnija 6—7 hadoŭ vielmi raskručvajuć u turystyčnym płanie. Uviečary tam šmat simpatyčnych padśvietak, jość što pahladzieć.
Što nie atrymałasia naviedać — dyk heta Bajkanur, jaho pakiniem na nastupny raz.
Pryhody z zaradnymi stancyjami, abo Da čaho rychtavacca pry padarožžy na elektrakary pa SND?
— Ci ŭsio było dobra z zaradnymi stancyjami pa darozie? — zadali Alaksandru hałoŭnaje pytańnie.
— Usio z samaha pačatku pajšło nie tak, — pryznaje jon. — Kab narmalna prajechać Rasiju, treba kupić sim-kartu (amal usie prahramy dla rasijskich zaradnych stancyj patrabujuć pry rehistracyi miascovy numar). Ale ciapier jaje niaprosta nabyć inšaziemcu… Mnie daviałosia dvojčy jeździć u Smalensk, i dobra, što ja zaniaŭsia pytańniem zahadzia.
Usie prahramy ja taksama ŭstalavaŭ da pajezdki, pryviazaŭ numar i kartu, jakaja pracuje z płaciežnaj sistemaj «Mir» i ź miascovaj valutaj. Pad Smalenskam usio było dobra — da terminała treba było prosta prykłaści bankaŭskuju kartu. A voś u Mažajsku ŭźnikli prablemy. Uklučaju ja zaradku, a mnie prylataje esemeskaj kod 3‑D Secure, kab prahrama śpisała hrošy. Ale staronka, kudy treba ŭvodzić kod, nie adkryvajecca. Heta z-za taho, što ŭ Rasii ŭviali internet-abmiežavańni: staronki našych bankaŭ (mienavita dla ŭvodu koda) «adfutbolvajucca».
Na ščaście, na hadzińniku było tolki kala 17:00. Ja pabieh u najbližejšy bank, ale mnie skazali, što nie paśpiejuć zrabić kartu, i adpravili ŭ «Hazpram». Tam u mianie paprasili pierakład zamiežnaha pašparta. Jon u mianie byŭ, ale ja nie ŭziaŭ jaho z saboj. U vyniku pašancavała, što na ID-kartcy danyja prapisanyja ŭ tym liku na ruskaj movie. U vyniku rasijskuju kartu mnie adkryli, ja tudy pakłaŭ hrošy, pryviazaŭ jaje da prahramy — i ŭ nas atrymałasia zaradzicca. Z-za hetaha vyrašyli, što načavać nidzie nie budziem, a pajedziem dalej, kab nahnać čas.
U Samary byŭ adzin ź niešmatlikich zaradnych apierataraŭ, jaki dazvalaje zarehistravacca z dapamohaj biełaruskaha numara. Zapuścili my zaradku, jaje košt — 18 z pałovaj rasijskich rubloŭ za kiłavat, a ŭ mianie z karty pačali śpisvacca pa 18 z pałovaj biełaruskich (26‑razovaja roźnica ŭ sumie. — Zaŭv. «Anłajniera»)! Hrošy ŭ mianie skončylisia imhnienna, zaradka spyniłasia. Ja napisaŭ pra hetu prablemu ŭ čat elektramabilistaŭ. Jany adkazali, što hetamu «kasiaku» ŭžo try hady i jaho nijak nie vypraviać. Hrošy, darečy, pakul nie viarnuli.
Jašče adzin «prykoł» byŭ u Pienzie. Tam dobraja mahutnaja zaradnaja stancyja, ale jana niedastupnaja praz mabilny internet. Pra heta ja daviedaŭsia ad kiroŭcy Tesla, jaki taksama pryjechaŭ zaradzicca. Jon rastłumačyŭ, što pobač jość sałon, za 300 mietraŭ ad jaho dastupny Wi-Fi. Treba padklučyć mašynu da stancyi, zatym złavić internet i pačać siesiju. Potym, kali mašyna zaradzicca, usio paŭtaryć u zvarotnaj paśladoŭnaści.
— Nie paškadavali, što adpravilisia ŭ padarožža na elektrakary?
— Ni ŭ jakim razie. Navat dumki nie praskokvała, maŭlaŭ, treba było na «bienzinie» jechać. U vyniku ž usio atrymałasia. Hałoŭnaje — viedać usie niuansy i padrychtavacca.
Stancyi na maršrucie pa Kazachstanie ja taksama zahadzia vyvučyŭ. Na našym šlachu było dva idučyja adzin za adnym doŭhija ŭčastki biez zaradak: 395 i 450 km. Ja papiarednie źviazaŭsia z adnym kazachstancam, jaki ŭ minułym hodzie ładziŭ aŭtaprabieh pa krainie na elektrakary. Pryčym u jaho mašyna z bolš słaboj batarejaj — na 57 kVt⋅h, ale jon zmoh pieraadoleć hetyja ŭčastki. U vyniku ja jechaŭ na kruiz-kantroli z chutkaściu 90—95 km/h. Pieršy ŭčastak praminuli biez prablem, a ŭ druhim vypadku, kali dajechali da zaradki, u nas zastavałasia ŭsiaho 70 km zapasu chodu (na zvarotnym šlachu paśla hetaha ŭčastka — 30—32). Kali b stancyja pamiž dvuma ŭčastkami nie pracavała — tady byŭ by kvest. Darečy, kab zapuścić zaradku, taksama patrebnyja byli prahrama i miascovaja sim-karta — jaje my kupili na miažy.
— A jak spravy sa stancyjami ŭ Taškiencie?
— Kali ja tam byŭ čatyry hady tamu, to ŭsiaho adzin raz sustreŭ Tesla i adzin raz — elektryčnuju BMW. Adpaviedna, zaradak nie było. Ale ciapier ich kuča. Reč u tym, što va Uźbiekistanie pačali zborku BYD.
Što pahladzieć u Taškiencie i jakuju sumu padrychtavać?
— Što hladzieli ŭ Taškiencie? Ja tradycyjna źjeździŭ u hory i na vadaspady. Schadzili na rynak, u handlovy centr Tashkent City Mall. Pahladzieŭ, što ŭ pryncypie źmianiłasia za čatyry hady.
Što my nie naviedali ŭ Taškiencie (choć varta było), dyk heta niadaŭna adkryty Centr isłamskaj cyvilizacyi. Taksama my dumali pra Samarkand, ale vyrašyli, što dadatkovyja 300 km — heta było b zanadta.
Asobna varta adznačyć miascovuju kuchniu: u lubym miescy smačna nakormiać płovam abo šašłykom.
Ahulnyja vydatki (zaradki, strachoŭki, płatnyja darohi, charčavańnie, pražyvańnie) — $530 na čałavieka.
Na zaradki ŭ darozie było vydatkavana 137,47 BYN, 16 673,6 RUB, 46 419,2 KZT (kazachstanski tenhie) i 96 780 UZS (uźbiekistanski sum). U dalarach pa kursie na pačatak maja heta $48,69, $222,9, $100,27 i $8,07 (sumarna amal $380).
Jakuju b paradu daŭ uładalnikam elektrakaraŭ, jakija źbirajucca adpravicca ŭ padarožža? Kali mašyna z narmalnaj batarejaj — to ničoha nie bajacca!
«Mieć mašynu, daražejšuju za kvateru? Takoje mahčyma tolki ŭ Minsku». Francuz raskazaŭ, čym jaho ździŭlajuć biełarusy
Tanny anałah Jehipta. Biełaruska raskazała, jak adpačyła ŭ Kambodžy
9 krain, jakija varta naviedać biełarusam u hetym hodzie. Parady ad padarožnika
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ
Jak ciapier žyvie «surovy turyst» ź Biełarusi, jaki staŭ znakamitym 12 hadoŭ tamu
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club4
Kamientary