Ukrainiec pryznaŭ vinu ŭ vandaliźmie ŭ dačynieńni da miačeciaŭ u Łondanie. Jaho vierbavaŭ rasijanin
Jaho moh zavierbavać rasijanin, jaki staić za padpałami majomaści Kira Starmiera.
21‑hadovy ŭkrainiec Illa Biłyk u čaćvier pryznaŭ u łondanskim sudzie vinu ŭ piaci vypadkach vandalizmu ŭ dačynieńni da miačeciaŭ i budynkaŭ musulmanskich arhanizacyj u Łondanie. Biłyka moh zavočna, praz Telegram, zavierbavać toj ža čałaviek, źviazany z rasijskimi ŭładami, abo taja ž arhanizacyja, jakija zamovili padpały majomaści, źviazanaj z byłym premjer-ministram Kiram Starmieram, piša Bi-bi-si.
23 studzienia 2025 hoda Biłyk nanios abraźlivyja hrafici na budynak Isłamskaj asacyjacyi ŭ Stratfardzie, miačeć Al-Bir i miačeć Džamia ŭ Łejtanie na ŭschodzie Łondana. Praz dva dni jon nanios hrafici na pačatkovuju škołu Nur-ul-Isłam i Isłamski saviet šaryjatu.
Bi-bi-si stała viadoma, što Biłyk skazaŭ palicyi, što zadańnie nanieści hrafici jon atrymaŭ ad ruskamoŭnaha karystalnika ŭ Telegram. Biłyk zajaviŭ, što ruskamoŭny čałaviek ukazaŭ jamu, dzie treba nanieści hrafici, i zapłaciŭ jamu paśla vykanańnia zadańnia.
U červieni łondanski sud adpraviŭ u turmu za padpały damoŭ i aŭtamabila, źviazanych z tahačasnym premjer-ministram Kiram Starmieram, 22‑hadovaha hramadzianina Ukrainy Ramana Łaŭrynoviča i 27‑hadovaha hramadzianina Rumynii ŭkrainskaha pachodžańnia Stanisłava Karpiuka.
Rasśledavańnie, praviedzienaje Bi-bi-si i arhanizacyjaj Hope not Hate, vyjaviła, što za padpałami stajała Rasija.
Pavodle vysnoŭ rasśledavańnia, Łaŭrynoviča i Karpiuka zavierbavaŭ za hrošy praz Telegram karystalnik ź inicyjałami EL. Pavodle ŭdzielnikaŭ rasśledavańnia, heta moh być rasijski dypłamat Jaŭhien Lukšyn, jaki dystancyjna arhanizoŭvaŭ maštabnuju kampaniju sabatažu i pravakacyj praz sacyjalnyja sietki i Telegram.
Pavodle vysnoŭ rasśledavańnia, EL daručyŭ Łaŭrynoviču nanieści isłamafobskija hrafici na ścieny miačeci; jon ža aktyŭna ŭdzielničaŭ u administravańni kanała fejkavaj ultrapravaj hrupoŭki Direct Action UK, stvoranaj i kiravanaj supracoŭnikami rasijskich śpiecsłužbaŭ dla pravakavańnia aktaŭ vandalizmu na brytanskich vulicach.
U studzieni 2025 hoda, kali Biłyk nanios hrafici ŭ vyznačanych jamu miescach, ich fatahrafii byli apublikavanyja ŭ Telegram-kanale Direct Action, a EL praź niekalki hadzin paśla hetaha raźmiaściŭ va ŭkrainskaj hrupie pošuku vakansij u Brytanii prośbu dasyłać fatahrafii hetych miescaŭ.
Prysud Biłyku budzie vyniesieny 19 kastryčnika ŭ mahistratskim sudzie Stratfarda.
Hałoŭny supierintendant łondanskaj palicyi Rona Chant zajaviła: «My pryznajom, što hetyja incydenty pryčynili značnyja pakuty musulmanskim supolnaściam va ŭschodnim Łondanie letaś i praciahvajuć vyklikać zaniepakojenaść».
«Złačynstvy na hlebie nianaviści da musulman i isłamafobija absalutna niedapuščalnyja ŭ Łondanie. My poŭnyja rašučaści zmahacca sa złačynstvami na hlebie nianaviści, adnačasova padtrymlivajučy i supakojvajučy našy supolnaści», — dadała Rona Chant.
Kamientary