Było minus 20 hradusaŭ, stała minus 15. Namieśnik kiraŭnika MZS Polščy acaniŭ paciapleńnie adnosin ź Minskam

Pavodle słoŭ Basackaha, ich «tempieratura» vyrasła ź minus 20 da minus 15 hradusaŭ, piša Reform.news.

«Ja b vyznačyŭ heta tak: tempieratura ŭzajemnych adnosin była minus 20 hradusaŭ, a ciapier, mahčyma, z-za taho, što adbyłosia z Andrejem Pačobutam i hetym abmienam, — minus 15 hradusaŭ, ale dakładna nie źmianilisia fundamientalnyja pryčyny, z-za jakich polska-biełaruskija dačynieńni takija drennyja.

Heta padtrymka Biełaruśsiu rasijskaj vajny va Ukrainie, jakaja, praŭda, źniziłasia, ale hibrydny cisk z boku Biełarusi pa-raniejšamu praciahvajecca. Heta adbyvajecca ŭ zmovie z Rasijaj. Havorka idzie nie tolki pra sproby pierasiačeńnia miažy i pierapraŭki nielehalnych mihrantaŭ. Heta źmienšyłasia, ale, naprykład, zapusk kantrabandnych pavietranych šaroŭ praz polskuju miažu. Usio heta nie źmianiłasia. Patrebnyja dalejšyja kroki z boku Biełarusi, kab viarnuć hetyja adnosiny chacia b da nula (hradusa)», — skazaŭ Basacki ŭ ranišnim efiry TVP Info.

Viadučy prahramy Maryjuš Piakarski vyrašyŭ udakładnić u ministra rolu Rasii ŭ apošnich padziejach — ci nie choča Alaksandr Łukašenka źmienšyć zaležnaść ad Maskvy.

«My pierakananyja, što hety abmien adbyŭsia ŭ tym liku tamu, što ŭ jaho byli ŭciahnutyja rasijanie, i jany chacieli hetaha šyrokaha abmienu, kab viarnuć svaich hramadzian. Ja ŭ cełym liču, što Łukašenka nie chacieŭ by być nastolki zaležnym ad Pucina. Kožny kiraŭnik, taksama i dyktatar, choča mieć peŭnuju prastoru dla manieŭru i svabody.

Ale my bačym, što ŭ samych važnych rašeńniach apošnich hadoŭ Łukašenka zaležyć ad Pucina. Mienavita ź jaho terytoryi ŭ 2022 hodzie była ździejśniena ataka na Ukrainu, i ciapier heta jaho terytoryja. Zaraz ź jaho terytoryi rasijskija bieśpiłotniki, jak my bačyli i ŭ vypadku z Polščaj, a nie tolki z Ukrainaj, atrymlivajuć dapamohu ŭ naviadzieńni na metu, i kali jany laciać, prynamsi, na poŭnač Ukrainy, Biełaruś dapamahaje.

I hetak dalej. Apieracyja pa adpraŭcy nielehalnych mihrantaŭ u Polšču i Litvu, biezumoŭna, źjaŭlajecca apieracyjaj, jakuju padtrymlivajuć rasijskija śpiecsłužby. Dumaju, Łukašenka chacieŭ by (bolšaj prastory dla manieŭru — zaŭv.), ale jaho prastora dla manieŭru vielmi abmiežavanaja, choć jaho adnosiny z Złučanymi Štatami ź minułaha hoda pašyrylisia», — adkazaŭ Basacki.

Adkazvajučy na pytańnie pra pryčyny cikavaści administracyi Donalda Trampa da Łukašenki i mahčymy jaho vizit u ZŠA, namieśnik ministra skazaŭ, što nie vyklučaje takoha raźvićcia padziej.

«A čamu administracyja Trampa i sam Tramp tak šmat układvajuć? Jon havoryć pra jaho, mahčyma, nie słovami maršałka Karčeŭskaha, što jon ciopły čałaviek, ale što jon… niadrenny partnior — takaja farmuloŭka. Tamu što ja liču, što Biełaruś — heta palihon dla Amieryki ŭ płanie paciapleńnia palityčnych adnosin i zaklučeńnia bujnych ździełak. Viadoma, ź Biełaruśsiu možna zaklučać uhody mienšaha maštabu, čym z Rasijaj, ale ŭ lubym vypadku jana pryvabnaja dla značnaj častki amierykanskaj elity, asabliva dla biznesu», — skazaŭ Basacki.

• 2
• 0
• 1
• 0
• 0
• 0
• 0
• 0