Было мінус 20 градусаў, стала мінус 15. Намеснік кіраўніка МЗС Польшчы ацаніў пацяпленне адносін з Мінскам
Намеснік міністра замежных спраў Польшчы Марцін Басацкі лічыць, што пасля абмену, які адбыўся на гэтым тыдні і ў выніку якога быў вызвалены Андрэй Пачобут, адносіны паміж Варшавай і Мінскам, калі і пацяплелі, то нязначна.
Паводле слоў Басацкага, іх «тэмпература» вырасла з мінус 20 да мінус 15 градусаў, піша Reform.news.
«Я б вызначыў гэта так: тэмпература ўзаемных адносін была мінус 20 градусаў, а цяпер, магчыма, з-за таго, што адбылося з Андрэем Пачобутам і гэтым абменам, — мінус 15 градусаў, але дакладна не змяніліся фундаментальныя прычыны, з-за якіх польска-беларускія дачыненні такія дрэнныя.
Гэта падтрымка Беларуссю расійскай вайны ва Украіне, якая, праўда, знізілася, але гібрыдны ціск з боку Беларусі па-ранейшаму працягваецца. Гэта адбываецца ў змове з Расіяй. Гаворка ідзе не толькі пра спробы перасячэння мяжы і перапраўкі нелегальных мігрантаў. Гэта зменшылася, але, напрыклад, запуск кантрабандных паветраных шароў праз польскую мяжу. Усё гэта не змянілася. Патрэбныя далейшыя крокі з боку Беларусі, каб вярнуць гэтыя адносіны хаця б да нуля (градуса)», — сказаў Басацкі ў ранішнім эфіры TVP Info.
Вядучы праграмы Марыюш Пякарскі вырашыў удакладніць у міністра ролю Расіі ў апошніх падзеях — ці не хоча Аляксандр Лукашэнка зменшыць залежнасць ад Масквы.
«Мы перакананыя, што гэты абмен адбыўся ў тым ліку таму, што ў яго былі ўцягнутыя расіяне, і яны хацелі гэтага шырокага абмену, каб вярнуць сваіх грамадзян. Я ў цэлым лічу, што Лукашэнка не хацеў бы быць настолькі залежным ад Пуціна. Кожны кіраўнік, таксама і дыктатар, хоча мець пэўную прастору для манеўру і свабоды.
Але мы бачым, што ў самых важных рашэннях апошніх гадоў Лукашэнка залежыць ад Пуціна. Менавіта з яго тэрыторыі ў 2022 годзе была здзейснена атака на Украіну, і цяпер гэта яго тэрыторыя. Зараз з яго тэрыторыі расійскія беспілотнікі, як мы бачылі і ў выпадку з Польшчай, а не толькі з Украінай, атрымліваюць дапамогу ў навядзенні на мэту, і калі яны ляцяць, прынамсі, на поўнач Украіны, Беларусь дапамагае.
І гэтак далей. Аперацыя па адпраўцы нелегальных мігрантаў у Польшчу і Літву, безумоўна, з’яўляецца аперацыяй, якую падтрымліваюць расійскія спецслужбы. Думаю, Лукашэнка хацеў бы (большай прасторы для манеўру — заўв.), але яго прастора для манеўру вельмі абмежаваная, хоць яго адносіны з Злучанымі Штатамі з мінулага года пашырыліся», — адказаў Басацкі.
Адказваючы на пытанне пра прычыны цікавасці адміністрацыі Дональда Трампа да Лукашэнкі і магчымы яго візіт у ЗША, намеснік міністра сказаў, што не выключае такога развіцця падзей.
«А чаму адміністрацыя Трампа і сам Трамп так шмат укладваюць? Ён гаворыць пра яго, магчыма, не словамі маршалка Карчэўскага, што ён цёплы чалавек, але што ён… нядрэнны партнёр — такая фармулёўка. Таму што я лічу, што Беларусь — гэта палігон для Амерыкі ў плане пацяплення палітычных адносін і заключэння буйных здзелак. Вядома, з Беларуссю можна заключаць угоды меншага маштабу, чым з Расіяй, але ў любым выпадку яна прывабная для значнай часткі амерыканскай эліты, асабліва для бізнэсу», — сказаў Басацкі.
Каментары
Давайте повысим "температуру" до -12 гр.С , пусть Поляцы согласятся на возобновление движения поезда Брест-Тересполь, но только в одну сторону и с двойной ценой. Для начала один раз в день по пятницам и субботам днем из Тересполя до Бреста, обратно пустой ( решают польские погранцы находящиеся в поезде). Компенсация за "пустой рейс" обратно из Бреста до Тересполя двойная цена по маршруту Тересполь-Брест. Доход между польским ПКП и Бел.Ж.Д. пополам... А дальше - будем посмотреть...
Выиграют ВСЕ, кроме группы лиц, которая сейчас организует очередь из пустых автобусов, чтобы "вынуждать" пассажиров перемещаться в первые автобусы за дополнительную оплату "кэшэм". https://d2accbiqacj5y8.cloudfront.net/394098