Sabčak i były kiraŭnik RT Krasoŭski padčas intervju katalisia ŭ aŭtazaku pa Maskvie. «Spynicie, b**. Ja što, u zakładnikach?»
Skandalny rasijski prapahandyst raskazaŭ, ci škaduje pra svoj taniec u pižamie «Armija Rasii» ŭ pieršyja dni vajny i ci treba brać Kijeŭ.
Anton Krasoŭski ŭ roznyja časy pracavaŭ u vydavieckim domie «Kommiersant», na telebačańni, a taksama zajmaŭ pasadu hałoŭnaha redaktara časopisa «Snob».
Z 2020 hoda Krasoŭski pracavaŭ dyrektaram ruskamoŭnaha viaščańnia telekanała Russia Today. U kastryčniku 2022 hoda paśla skandalnaha efiru, u jakim jon zaklikaŭ «tapić i spalvać» ukrainskich dziaciej, Krasoŭski byŭ adchileny ad pracy na RT.
Kaliści Krasoŭski byŭ blizkim paplečnikam Ksienii Sabčak: u 2018 hodzie jon uznačalvaŭ jaje štab na prezidenckich vybarach u Rasii.
Častka jaho ciapierašniaha intervju Sabčak prachodziła ŭ arendavanym aŭtazaku, jaki ruchaŭsia pa vulicach Maskvy. U niejki momant Krasoŭski pačaŭ patrabavać spynić aŭtazak:
«Spynicie, b**, kali łaska, aŭtobus, ja pierasiadu ŭ svaju mašynu. Spynicie aŭtobus na prypynku! Ja, b**, pakryju vašy štrafy. (…) Vy što, nie zrazumieli mianie? Ja što, u zakładnikach, ja nie razumieju?».
U vyniku Sabčak paprasiła, kab spynilisia na najbližejšym prypynku. Krasoŭski, jaki kazaŭ, što jamu stała kiepska, pierasieŭ u svaju mašynu. Razmova praciahnułasia praź niekatory čas u kvatery Krasoŭskaha.
«Liču Ukrainu častkaj Rasijskaj impieryi»
Ksienija Sabčak nahadała Krasoŭskamu pra toje, što navat siabry ad jaho adviarnulisia praź jaho radykalnuju pazicyju. Sam viadučy ŭ adnym ź intervju raskazaŭ, što piśmieńnik Siarhiej Minajeŭ pierastaŭ ź im kamunikavać, tamu što Krasoŭski «…banuŭsia na vajnie».
Sabčak paprasiła patłumačyć, što značać hetyja słovy.
«Heta maja była vajna. Dla mianie heta nikoli nie była vajna pa zamovie i nie jość. To bok mnie nichto nie kazaŭ, što treba być za vajnu», — adkazaŭ Krasoŭski i zhadaŭ, što ŭ dziacinstvie čatyry hady pražyŭ na Vałyni (jaho baćka byŭ načalnikam kanstruktarskaha biuro Rovienskaj AES).
Pa słovach Krasoŭskaha, jon byŭ pad uražańniem, pabačyŭšy tranślacyju pačatku vajennych dziejańniaŭ 24 lutaha 2022 hoda, kali rakiety lacieli na znajomyja jamu harady — Łuck, Koviel, Roŭna.
Pa słovach viadučaha, častka jaho adnakłaśnikaŭ-ukraincaŭ zahinuła na ŭschodzie Ukrainy jašče ŭ 2014—2018 hadach. «Heta moj kraj, maja ziamla», — kaža Krasoŭski pra Ukrainu.
«Ale ty jaje (Ukrainu. — NN) ličyš svajoj krainaj, jak častku Rasii?» — udakładniła Sabčak.
«Maja radzima — horad-hieroj Maskva. Maja radzima — SSSR. Maja radzima — Rasijskaja impieryja. Ja liču jaje častkaj Rasijskaj impieryi. Dla mianie heta niejkaja ŭnutranaja impieryja», — adkazaŭ Krasoŭski.
Kali Krasoŭski ščyry?
U kastryčniku 2022 hoda Krasoŭski zajavu ŭ efiry RT, što ŭkrainskich dziaciej, jakija ličać Rasiju akupantam, treba «tapić u race z burnaj płyńniu». Paśla hetaha jon byŭ zvolnieny z kanała i zapisaŭ videa z pakajańniem. U im jon nazvaŭ siabie durniem.
Adnak paźniej u efiry adnaho z YouTube-prajektaŭ na pytańnie, ci škaduje ab svaich słovach, Krasoŭski adkazaŭ «nie».
«U jaki momant ty byŭ ščyry?» — udakładniła Sabčak.
«Ja ščyry ŭ kožnym z hetych momantaŭ. (…) Ja prosta niapravilna sfarmulavaŭ tady frazu. Ale sens hetaj frazy byŭ vielmi prosty, jaki ja skazaŭ pra dziaciej, voś takich ukrainskich. Što voś kali idzie sapraŭdy ruski sałdat pa Bierlinie, a jamu ŭ śpinu stralaje Hitleriuhiend — my što z hetym Hitleriuhiendam robim? Voś što ja skazaŭ. Ja prosta jak by byŭ na kuražy. I ja prasiŭ prabačeńnia ščyra», — patłumačyŭ Krasoŭski.
Adnak, jak vyśvietliłasia ŭ chodzie razmovy, prabačeńni Krasoŭskaha byli adrasavany nie dzieciam ci achviaram vajny, a jaho kiraŭnictvu:
«Ja prasiŭ prabačeńnia ščyra, tamu što ja razumieŭ, što takim čynam padstaviŭ Marharytu [Simańjan]. (…) Ja prasiŭ prabačeńnia dla hetych ludziej».
«Treba brać Kijeŭ?»
Na pytańnie Sabčak, ci ličyć jon nieabchodnym brać Kijeŭ, Krasoŭski adkazaŭ:
«Ja b sfarmulavaŭ «Možna ŭziać Kijeŭ?», a nie «treba brać Kijeŭ». Kali b pytańnie stajała «treba uziać Kijeŭ» — viadoma, treba. I Varšavu treba».
«Navošta Varšavu? Navošta brać Kijeŭ?» — pacikaviłasia Sabčak.
«Heta našy harady. Heta Rasijskaja impieryja. Tamu što, jak u apokryfie kazaŭ tavaryš Stalin Uinstanu Čerčylu na pytańnie «Navošta vam Lvoŭ, heta ž nie ruski horad?», tavaryš Stalin adkazaŭ: «Zatoje Varšava ruskaja». Ja jašče raz paŭtaru: ja heta ŭžo skazaŭ, ja čałaviek, jaki žyvie ŭ katehoryjach Rasijskaj impieryi, ruskaj impieryi. Dla mianie Kijeŭ — heta ruski horad».
Ale ŭziać Kijeŭ ciapier niemahčyma, kaža Krasoŭski, bo heta «kaštuje zanadta šmat žyćciaŭ» ruskich.
Ja b tady spytaŭ: ci chacieŭ by ja, kab Kijeŭ, kab hetaja ziamla znoŭ była častkaj vialikaj ruskaj impieryi? Tak, chacieŭ. Ci chacieŭ by ja, kab była naohuł vialikaja ruskaja impieryja z ruskim impierataram? Tak, chacieŭ. Ale hetaha ciapier nie budzie. I kali b mnie pryjšłosia prymać rašeńnie, miljony žyćciaŭ u abmien na Kijeŭ — ja b vybraŭ miljony žyćciaŭ. Ludzi i tak pamirajuć, ale kab jany nie hinuli ŭ abmien na toje, čaho niama. U abmien na ziamlu bieź idei», — patłumačyŭ Krasoŭski.
Pra taniec na bałkonie ŭ pižamie «Armija Rasii»
Znachodziačysia ŭ kvatery Krasoŭskaha, Sabčak adrazu źviarnuła ŭvahu na bałkon i pacikaviłasia, ci nie na im Krasoŭski radasna tancavaŭ u pižamie «Armija Rasii» pad huki vajennaha marša ŭ pieršyja dni ŭvarvańnia. Rolik z tancam jon paźniej vykłaŭ u sacyjalnych sietkach. Žurnalist paćvierdziŭ heta.
Sabčak spytała, ci nie škaduje Krasoŭski pra toj taniec.
«Nie, ja nie škaduju. Mnie nie niajomka za toj taniec. Jak by ideałahična mnie nie niajomka, ale estetyčna ja b zrabiŭ niejak bolš cikava. Estetyčna niejkija rečy, jakija ja rabiŭ, rablu i, ja ŭpeŭnieny, kali budu žyvy, budu rabić — mnie nie padabajucca. Ja vyhladaŭ u hetaj situacyi jak mudak», — adkazaŭ Krasoŭski.
Kamientary